《埃及‧隨想隨寫》- Play Safe?

有唔少朋友一聽到小編要去埃及，就話咁危險你都去，會唔會遇到恐怖襲擊呀? 的確，埃及周不時都會發生恐怖襲擊，單單係2019年就已經有3單，所以香港政府對埃及長期發出紅色旅遊警示，建議你應該轉變行程，避免前往當地。 講真，一開始小編都有少少驚，尤其出發前一星期咁岩就發生左一單恐怖襲擊，但為左實現兒時夢想，就決定按原訂日子出發。其實，如果留意恐怖襲擊的地點，通常都會發生係熱門的遊客區，尤其係吉薩金字塔區。因此，如果跟任何形式的旅行團去參觀金字塔或者阿布辛貝神殿都會有軍警及軍車隨行，感覺上較為安心。同時，我問過當地導遊，既然周圍都有軍警，點解仲會發生恐怖襲擊。佢細細聲係耳邊同我講主要原因係出事的司機為左貪方便，所以停左係非安全停車區域俾遊客落車，而當中已經預先俾恐怖分子設置左炸彈，因而經過就會不幸爆炸。佢之後再同我講，正常就唔會有危險，當然唔好貪平參加一些不知名的當地遊行團。 至於係市集或者街上行，小編覺得又唔算好危險，最多當地人都係以奇異的眼光望住你，但呢樣係歐州都時有發生，唔算好出奇。而係市集到更加以為你係中國遊客而盛情招呼你，但當佢地知道你只係window shopping而唔係俾錢幫襯，就會即刻「變臉」，黑住面擰轉頭走番入舖裏面。