亞美尼亞包車一日遊 - Tsaghkadzor 纜車 + 塞凡湖 Lake Sevan + 帕爾茲湖 Lake Parz - Armenia - Blog by 出發吧｜旅魔頭

高加索行程去到第12日，前一晚從納卡返回亞美尼亞首都葉里溫已經係半夜，所以呢一日實在冇辦法好早起身😴本來打算參加one way tour旅行社嘅一日團，價錢都好平，但係實在唔想再做鴨仔同埋聽介紹～所以我哋取消咗個local tour，自己搵包車去亞美尼亞著名景點-塞凡湖！一早我哋就聯絡返早幾日用Yandex.Taxi 認識嘅司機「蝦膏」，一日價錢$18000AMD ^{(USD 46)}全日（$296hkd)，參加一日團都差不多要百幾蚊港紙一位，所以有三個人都係包車好~

順次序講下嗰日嘅行程

Tsaghkadzor 纜車

Tsaghkadzor係一個滑雪勝地，滑雪場夏天嘅時候仍然會開放纜車，比人登山觀光~欣賞山上面嘅四季景色！由於係滑雪纜車🚡會腳fing fing咁，落車要小心啲快啲離開，因為纜車係唔會停低嘅💪🏽仲有要注意要着多啲衣服，山上邊超凍！我上去嘅時候仲要落雨陰天☁️所以唔係好享受，好快就落返山🤦🏾‍♀️

Tsaghkadzor

塞凡湖 Lake Sevan

塞凡湖係高加索最大嘅高山湖泊，距離首都葉里溫60公里，被譽為「高加索的眼淚💧」，夏天係避暑聖地，水質乾淨係飲用水嘅標準，附近餐廳都有得食湖魚～塞凡湖係去亞美尼亞必去嘅景點之一！最佳觀賞地點係Sevanavank修道院。尤其是夏天，湖邊野花滿山遍野，配搭寶石藍嘅湖水，靚～都係可惜我去呢一日陰天落雨，啲相影唔出佢有幾靚🤦🏾‍♀️我上網睇人哋好天嘅時候佢真係超靚架😭算啦天氣嘅嘢只能靠運氣，無緣見到佢最靚嘅狀態😭 交通方法：包車或者可以坐巴士249號到北部汽車站，再轉乘小巴到達塞凡小鎮$500AMD ^{(USD 1)}，坐車比較轉折所以都係建議包車。

塞凡湖

迪利然帕爾茲湖 Lake Parz in Dilijan

呢個景點冇咁多人認識，我本來都唔知（後來睇返one way tour都有一日團過去呢度玩），係我個司機強烈推薦所以我哋過去，呢個地區係溫泉區，算係當地人熱門旅遊地點。lake parz唔大，好快睇完，湖嘅倒影幾靚，湖邊係一個露營區，大概就係星期六日當地家庭會帶啲小朋友過去玩咁樣~ 亞美尼亞嘅食物我真係覺得麻麻地，冇咩值得推介，一唔係超鹹一唔係就超酸....

帕爾茲湖

可以參考下one way tour嘅一日團，咁就可以睇到價錢同埋有咩景點，再衡量要包車定係跟local tour

包車司機聯絡方式

司機 WhatsApp：hagop（蝦膏）+374 43 187437 / +374 77 929938 收費參考：深坑修道院來回葉里溫$10000AMD ^{(USD 26)} lake sevan +tsaghkadzor纜車+dilijan 迪利然lake parz 來回$18000AMD ^{(USD 46)}（$296hkd)

是日消費

D12 10/6 tsaghkadzor+lake sevan 早餐$4950AMD ^{(USD 13)} 午餐$12870AMD ^{(USD 33)} tsaghkadzor吊車四人$8000AMD ^{(USD 21)} 廁所$300AMD ^{(USD 1)} 買水及車厘子$540AMD ^{(USD 1)} 包車一日費用$18000AMD ^{(USD 46)} Total:$44660AMD ^{(USD 115)}/3= 人均消費14887AMD ^{(USD 38)}=$244hkd

* * * article collected under 出發吧｜旅魔頭 / Armenia * * *

亞美尼亞包車一日遊 - Geghard 格加爾德修道院 + Garni 加尼神廟 + 葉里溫階梯

亞美尼亞包車一日遊 - Tsaghkadzor 纜車 + 塞凡湖 Lake Sevan + 帕爾茲湖 Lake Parz