六、殘酷的命運

遊行團的行程唔算緊密，之後參觀左一個公園、化妝品廠、藝術館等，而壓軸參觀景點係探訪幼兒園。有一點我覺得有點奇怪，明明當天係星期日，點解小朋友同老師都要番學呢? 到埗後見到老師列隊歡迎我地，就知道幼兒園其實係表演場地。 首先一入去，望到個格局同香港幼稚園都類似，而幼兒園中並唔係間間課室都開，而開俾我地睇的課室就會有唔同的小朋友表演。首先第一個小朋友寫毛筆字，小朋友並沒有枱頭望過我們，只係不斷好似機械人咁寫字，寫完一張又一張，我唯有望兩望就盡快離開，希望佢之後可以休息下。 之後上到二樓，就有另一班學生分別係度唱歌同埋彈琴，見到佢地個樣有些累，全程都無笑容，或者全程要不斷唱同不斷彈的關係。最後上到三樓，全部遊客都入晒去禮堂，觀賞幼年版的「阿里朗」表演。表演人員超過一百名小朋友，個個都化晒妝，著左唔同的表演制服，七情上面咁表演。 表演環節五花八門，主要係唱歌，亦會有其他才藝表演例如呼拉圈、藍球、跳舞等。整場表演歷時約一小時，表演相當精彩，但由於表演者大部分都係4-5歲小朋友，反而覺得心寒，心想他們要表演到零瑕疪，肯定要接受不斷殘酷的訓練，但調轉咁諗，佢地已經係北韓小朋友中最優秀的一班人，至少能夠三餐溫飽，咁係北韓黎講算唔算已經幸福呢? 基本上我都沒有專心觀賞這場表演，只留下內心矛盾的心情。 著名投資者巴菲特曾經說過﹕「對於世界上70億人口中的絕大部分來說，出生的子宮在很大程度上決定了一個人的命運。」同樣聰明絕頂的小朋友，出生於北韓或者香港，就算北韓小朋友如何努力上進，都未必能夠擺脫殘酷的命運。