现职空姐，工余时间不停去旅行，捐窿捐罅四围走
2019年9月6日
高加索行山胜地
@ Juta ჯუთა
Kazbegi, Georgia
山岳、洞穴
一二三四五六日全日
去 Juta Valley 行山系我格鲁吉亚行程入面最喜欢嘅一个活动❤️
继续仲系 day 7 嘅行程，一早由 Stepantsminda 去完卡兹别克嘅圣三一教堂之后，我地就去 Juta 行山👣
Juta 系一个行山好去处，风景优美。距离 Stepantsminda 大约20公里，车程大约35分钟，全部都系山路，由巴士站包的士来回 $120GEL (CNY 324)（包含等候四到五小时）。由于位置比较偏远，冇公共交通工具可以直达，只能自己包车，又或者可以预订巴士站附近旅行社嘅小巴士（$30GEL (CNY 81)一人，早上有两班）。
Juta 山脚下有几间小酒店可以入住，重点系山上亦有两间 campsites 可露营或者入住木屋，设施齐备，厕所啊餐厅通通都有！超正啊，一行出门口就见到个大雪山🏔️
首先，行近啲嗰间叫做 Zeta Camping，由山脚起大约30分钟内就可以行到上去，再入d嘅叫 Fifth Season，景观更开扬广阔，不过就要行45分钟左右先到，如果有行李要入住就比较麻烦（可以请驴仔拖上去）。
本来我想入住一晚，但系又好担心山区会落雨，行上去就好湿滞，而且天气会好冻，谂住观察下个天气先，临近入住先 book，谁不知我决定要 book 嘅时候已经冇晒房，哎呀，冇得住喺山上面添🤦🏾♀️冇办法，咁我唯有由 Stepantsminda 出发当天来回吧，都好嘅唔使搬酒店咁麻烦..
Juta 高加索山区系行山胜地，可以因应能力而选择长短不一样嘅行山路线（有啲专业嘅行山旅行团可能行一至两日都有），由于我哋时间有限，所以就选择行到 Zeta Camping 先食饭休息一阵，再行上 Fifth Season 就行返转头，建议逗留起码六个钟，咁就唔使赶头赶命，可以喺山上面hea下～
山路都唔算难行，起初比较斜同凹凸不平多石仔，但整体来讲都算简单易行，我有见到亚洲籍嘅家长带同小朋友一齐行上去。
Campsite 食物一般而且比较贵，不过随便食下就是但啦😅仲有记得带水同埋外套上山～
豆袋沙发同吊床都系 Fifth Season 嘅设施，唔系住客都可以用，只需帮衬食野或买野饮就可以了～
强烈推荐会去卡兹别克 Stepantsminda 嘅朋友，可以停留大半日时间去 Juta 行山，有条件嘅可以住一晚添～绝不后悔呀！
| 上一篇 | : | |
| 下一篇 | : |