土庫曼🇹🇲食物中毒記🤮🤢💩

又好多日無update，三日土庫曼之旅前日完結，已經陸路過境烏茲別克，依家响烏兹別克已經第三日。

講下前日土庫曼行程嘅最後一日，再前一晚我哋响沙漠露營，好玩⛺️早上收拾帳篷行李之際，我個肚就開始唔舒服，有啲絞動嘅感覺，心知不妙...幸好臨上車離開之前，自行搵到個小石山遮掩就地解決💩（冇廁所的，個個都係就地解決），就發現今次死火，肚疴添🤦🏾‍♀️🤦🏾‍♀️🤦🏾‍♀️

車程大約三個鐘，先去到邊境附近最後一個景點....路況勁差，已經坐得唔舒服，再加埋絞肚，我唯有用眼瞓戰勝佢，訓左個幾鐘..之後終於有油站，油站個廁所真係一言難盡，係旱廁極臭一地💩一地蟲，但係都冇辦法我都要痾🤦🏾‍♀️🤦🏾‍♀️🤦🏾‍♀️好嘔心哎哎 去完上車，都感覺未完，頂多100公里，終於到景點，我又飛奔跑去廁所🚾十五分鐘內來回去左兩次，個廁所極恐怖🤢冇得鎖門，一條坑咁嘅踎廁，撇除滿地屎，極度臭，地上仲有好多好大隻好似螞蟻嘅蟲，係咁爬上我隻腳度😫媽呀😫我真係xxyyzzz唔識形容🤦🏾‍♀又驚有人開門，又驚啲蟲爬上隻腳，又驚整污糟隻腳，又冇得洗手沖廁🤦🏾‍♀️畢生難忘😰 景點我無力行，我有d發冷，草草睇左兩眼就上車休息食藥，等小伙伴去睇😞之後再坐車一個鐘去到邊境城市，食午飯，再準備被送出境..為左對抗肚痾，我食左喇叭牌，再飲雙飛人藥水，果然係居家旅遊必備聖物，晏少少的確有好轉⋯⋯ 未完，好景不常🤦🏾‍♀️我另一位小伙伴去到餐廳就嚟料，開始又暈又頭痛又狂嘔🤮🤮好吧，咁即唔係我個人問題，一定係前一晚露營嘅BBQ肉類出事，可能雪藏不足加上天氣太熱（四十幾度）所以壞左，我哋食咗就搞成咁🤭 我哋當地導遊唔知係咪趕住收工（土庫曼旅遊通常都要包車包導遊，否則很難解決簽證及交通，呢方面嘅資料遲下再講），開始不理我哋死活，我哋兩個喺餐廳死死下根本離唔開廁所，佢仲係咁催促，話係時間要離開，送我哋去邊境，出境土庫曼，自行過去烏茲別克... 我哋兩個再齊齊食藥繼續上路，好快就去到邊境，我狀況已經有改善，但係我小伙伴情況每況愈下，又頭暈頭痛發冷全身無力再嘔... 去到土庫曼邊境，導遊協助我哋清關，出境蓋章，行李xray，全程打尖（之前睇攻略都有話遊客可以優先行，其他排隊啲人都冇話），導遊就送到呢度，出境之後就自力更生。

邊境估計有40幾度，熱到中暑咁樣嘅天氣，小伙伴真係企都冇力，我哋兩個幫佢拎住D行李，行一大段路，去到一個士兵哨站等過境巴士🚌 巴士係歡樂滿東華式熱狗單層巴，等左大約20分鐘先有車。等待期間，土庫曼大媽發現小伙伴情況不妙，主動讓座，各種關心，大媽以為佢中暑🥵我哋就用身體語言解釋係食錯野..大媽好仗義，同四圍啲人講睇吓可以點樣幫手，即刻好多人上前幫手又按摩又扇風咁又請飲水咁，幾經辛苦等到巴士到... 由於係歡樂滿東華巴士加上等左好耐，已經堆積左好多乘客行李又多，一架巴士都未必夠坐，所以巴士到站即刻爭先恐後迫上車，我哋咁樣嘅情況，再加上一人一個行李，本應一定係唔夠人迫，仗義大媽拉住我哋，大聲叫啲人讓開，大叫「tourist tourist」，四両撥千斤開路，再有幾位好心人我幫忙將我哋連人帶行李推上車，再叫我地坐低... 上落車全靠佢哋幫忙，一落車，小伙伴唔得了，邊行邊嘔，噴射到好似驅魔人咁🤮🤮都冇辦法呢啲位冇得休息唔可以停，邊境啲士兵喺隔離望住都愛莫能助，頂住，行一段路去到烏茲別克入境關口，又好多人要排隊，大媽同埋另外好心人士都係用同一招，幫我地全程插隊去到關員面前，關員都好快手check passport 同埋睇簽證，成功蓋章入境（關員有下笑左，因為有男有女一共三個當地人，幫我就暈嘅小伙伴用紙扇風）。邊檢海關見到我哋咁嘅情況，行李叫我哋唔使過xray （之前睇過其他人嘅遊記話行李要打開逐件逐件睇😅）。 超級狼狽嘅一次過境，好彩得到好多好心人嘅幫助，大媽同靚仔入境後送我哋去坐的士，協助將行李擺上車，司機都冇開天索價（邊境同埋火車站的司機通常會獅子開大口），交代埋俾的士司機我哋要去邊先走，土庫曼同埋烏茲別克好心人們，我會記住你架😭

再坐多個幾鐘的士🚕終於到達烏茲別克邊境古城khiva，小伙伴不行了，諗住直奔Airbnb 休息，點知又出事...個屋主話我冇回覆佢what’s app，所以預定左嘅房間已經租左比其他人，無房住😭😡大佬呀之前一早確認左，土庫曼係上唔到what’s app，連yahoo email都用唔到...唔覆唔代表唔住，出發前我都重複聯絡左兩次😡 唉，上booking.com即刻搵間古城中央好啲嘅酒店，再指手話腳表達俾司機知呢個情況，擾攘左一陣，司機打咗電話俾airbnb就明白了，開始walk in搵酒店...booking.com睇落幾好嗰間arkanchi 話無房，轉彎去第二間Khiva euroasia 話$75usd一晚，太貴，走，去到hotel kala終於有房，家庭食小酒店開價$45usd三人房含早，還價$40usd成交。房都不睇了，直接上房。酒店主人見到小伙伴情況，我哋同佢解釋完，點知佢轉頭就煲咗白粥同埋唔知咩草茶上房俾我哋，真係雪中送炭😭 幾經辛苦終於可以攤低休息，同埋已經一日冇沖涼了，污糟邋遢三個都好似乞兒仔咁😅如是者小伙伴就連續瞓咗15個鐘，同埋之後全日都係房間休息🙂我就瞓咗幾個鐘再食喇叭牌，就可以同另外一位小伙伴出街食飯（好彩佢冇出事），雖然我琴日同埋今日都仲有肚痾不過都叫做可以出街正常活動😛 今日我感覺已經好咗95%，復活了（小伙伴仲係爭啲）✌🏻✌🏻✌🏻依家坐緊高鐵🚄移動去另一個城市布哈拉，車程6個鐘所以得閒寫下字，都係遊記及攻略後補啦～ 配圖亂嚟，因為邊境現場拉住好多行李同身體不適，冇影低好心人同埋現場情況.. 最後祝好人一生平安🙏🏼亦都多謝大家睇我嘅千字文😅