土库曼🇹🇲食物中毒记🤮🤢💩

又好多日无update，三日土库曼之旅前日完结，已经陆路过境乌兹别克，依家响乌兹别克已经第三日。

讲下前日土库曼行程嘅最后一日，再前一晚我哋响沙漠露营，好玩⛺️早上收拾帐篷行李之际，我个肚就开始唔舒服，有啲绞动嘅感觉，心知不妙...幸好临上车离开之前，自行揾到个小石山遮掩就地解决💩（冇厕所的，个个都系就地解决），就发现今次死火，肚疴添🤦🏾‍♀️🤦🏾‍♀️🤦🏾‍♀️

车程大约三个钟，先去到边境附近最后一个景点....路况劲差，已经坐得唔舒服，再加埋绞肚，我唯有用眼瞓战胜佢，训左个几钟..之后终于有油站，油站个厕所真系一言难尽，系旱厕极臭一地💩一地虫，但系都冇办法我都要疴🤦🏾‍♀️🤦🏾‍♀️🤦🏾‍♀️好呕心哎哎 去完上车，都感觉未完，顶多100公里，终于到景点，我又飞奔跑去厕所🚾十五分钟内来回去左两次，个厕所极恐怖🤢冇得锁门，一条坑咁嘅踎厕，撇除满地屎，极度臭，地上仲有好多好大只好似蚂蚁嘅虫，系咁爬上我只脚度😫妈呀😫我真系xxyyzzz唔识形容🤦🏾‍♀又惊有人开门，又惊啲虫爬上只脚，又惊整污糟只脚，又冇得洗手冲厕🤦🏾‍♀️毕生难忘😰 景点我无力行，我有d发冷，草草睇左两眼就上车休息食药，等小伙伴去睇😞之后再坐车一个钟去到边境城市，食午饭，再准备被送出境..为左对抗肚疴，我食左喇叭牌，再饮双飞人药水，果然系居家旅游必备圣物，晏少少的确有好转⋯⋯ 未完，好景不常🤦🏾‍♀️我另一位小伙伴去到餐厅就嚟料，开始又晕又头痛又狂呕🤮🤮好吧，咁即唔系我个人问题，一定系前一晚露营嘅BBQ肉类出事，可能雪藏不足加上天气太热（四十几度）所以坏左，我哋食咗就搞成咁🤭 我哋当地导游唔知系咪赶住收工（土库曼旅游通常都要包车包导游，否则很难解决签证及交通，呢方面嘅资料迟下再讲），开始不理我哋死活，我哋两个喺餐厅死死下根本离唔开厕所，佢仲系咁催促，话系时间要离开，送我哋去边境，出境土库曼，自行过去乌兹别克... 我哋两个再齐齐食药继续上路，好快就去到边境，我状况已经有改善，但系我小伙伴情况每况愈下，又头晕头痛发冷全身无力再呕... 去到土库曼边境，导游协助我哋清关，出境盖章，行李xray，全程打尖（之前睇攻略都有话游客可以优先行，其他排队啲人都冇话），导游就送到呢度，出境之后就自力更生。

边境估计有40几度，热到中暑咁样嘅天气，小伙伴真系企都冇力，我哋两个帮佢拎住D行李，行一大段路，去到一个士兵哨站等过境巴士🚌 巴士系欢乐满东华式热狗单层巴，等左大约20分钟先有车。等待期间，土库曼大妈发现小伙伴情况不妙，主动让座，各种关心，大妈以为佢中暑🥵我哋就用身体语言解释系食错野..大妈好仗义，同四围啲人讲睇吓可以点样帮手，即刻好多人上前帮手又按摩又扇风咁又请饮水咁，几经辛苦等到巴士到... 由于系欢乐满东华巴士加上等左好耐，已经堆积左好多乘客行李又多，一架巴士都未必够坐，所以巴士到站即刻争先恐后迫上车，我哋咁样嘅情况，再加上一人一个行李，本应一定系唔够人迫，仗义大妈拉住我哋，大声叫啲人让开，大叫「tourist tourist」，四両拨千斤开路，再有几位好心人我帮忙将我哋连人带行李推上车，再叫我地坐低... 上落车全靠佢哋帮忙，一落车，小伙伴唔得了，边行边呕，喷射到好似驱魔人咁🤮🤮都冇办法呢啲位冇得休息唔可以停，边境啲士兵喺隔离望住都爱莫能助，顶住，行一段路去到乌兹别克入境关口，又好多人要排队，大妈同埋另外好心人士都系用同一招，帮我地全程插队去到关员面前，关员都好快手check passport 同埋睇签证，成功盖章入境（关员有下笑左，因为有男有女一共三个当地人，帮我就晕嘅小伙伴用纸扇风）。边检海关见到我哋咁嘅情况，行李叫我哋唔使过xray （之前睇过其他人嘅游记话行李要打开逐件逐件睇😅）。 超级狼狈嘅一次过境，好彩得到好多好心人嘅帮助，大妈同靓仔入境后送我哋去坐的士，协助将行李摆上车，司机都冇开天索价（边境同埋火车站的司机通常会狮子开大口），交代埋俾的士司机我哋要去边先走，土库曼同埋乌兹别克好心人们，我会记住你架😭

再坐多个几钟的士🚕终于到达乌兹别克边境古城khiva，小伙伴不行了，谂住直奔Airbnb 休息，点知又出事...个屋主话我冇回覆佢what’s app，所以预定左嘅房间已经租左比其他人，无房住😭😡大佬呀之前一早确认左，土库曼系上唔到what’s app，连yahoo email都用唔到...唔覆唔代表唔住，出发前我都重复联络左两次😡 唉，上booking.com即刻揾间古城中央好啲嘅酒店，再指手话脚表达俾司机知呢个情况，扰攘左一阵，司机打咗电话俾airbnb就明白了，开始walk in揾酒店...booking.com睇落几好嗰间arkanchi 话无房，转弯去第二间Khiva euroasia 话$75usd一晚，太贵，走，去到hotel kala终于有房，家庭食小酒店开价$45usd三人房含早，还价$40usd成交。房都不睇了，直接上房。酒店主人见到小伙伴情况，我哋同佢解释完，点知佢转头就煲咗白粥同埋唔知咩草茶上房俾我哋，真系雪中送炭😭 几经辛苦终于可以摊低休息，同埋已经一日冇冲凉了，污糟邋遢三个都好似乞儿仔咁😅如是者小伙伴就连续瞓咗15个钟，同埋之后全日都系房间休息🙂我就瞓咗几个钟再食喇叭牌，就可以同另外一位小伙伴出街食饭（好彩佢冇出事），虽然我琴日同埋今日都仲有肚疴不过都叫做可以出街正常活动😛 今日我感觉已经好咗95%，复活了（小伙伴仲系争啲）✌🏻✌🏻✌🏻依家坐紧高铁🚄移动去另一个城市布哈拉，车程6个钟所以得闲写下字，都系游记及攻略后补啦～ 配图乱嚟，因为边境现场拉住好多行李同身体不适，冇影低好心人同埋现场情况.. 最后祝好人一生平安🙏🏼亦都多谢大家睇我嘅千字文😅