[day5] 首都瓦萊塔 Valletta 古城
@ Valletta

遊覽以黃色嘅基調嘅首都瓦萊塔，最少需要大半日時間，唔使搭車，所有景點用腳行就可以到達，古城入邊有好多商店餐廳，夜晚又會有路邊嘅音樂表演，坐喺路邊嘅餐廳 chill一chill 好有 feel🤗 古城入邊 Old Mint Street 係最為出名嘅一條街，遊客必到，佢其實係一條古老嘅鑄幣街，又長又斜，兩邊嘅大廈都有特色嘅封閉式陽台，非常特別，不過對於好斜嘅街，住西環嘅小伙伴覺得冇特別😂因為佢屋企附近都大概係咁嘅樣😅😅

然後第二個景點我哋去到外觀低調但係內部金碧輝煌嘅聖約翰大教堂，門票好貴要10歐，不過已經包含咗電子導賞機。成個教堂嘅鎮店之寶就係油畫-被斬首的施洗者約翰，非常珍貴。

第三站，我哋去到免費入場嘅上巴拉卡花園，呢度風景優美，居高臨下可以眺望對岸嘅三姊妹城，而且正午12點會響禮炮。 從巴拉卡花園坐電梯落地底，再過馬路行去對面，就有船仔可以坐去對岸嘅三姊妹城，感覺好似平價貢多拉，只係兩蚊歐羅一位，好鬼抵坐！搖下搖下咁樣就可以過到從水路過對岸，三姊妹城有城堡、博物館等等建築，有不少地方都係權力遊戲嘅拍攝景點，影迷唔好錯過！ 好啦馬耳他就講到呢度先，下一篇講下快閃土耳其奇石林🇹🇷

是日三人總消費： 22/10 Valletta 船票 €13.95 ^{(USD 15)} 午餐 €27.75 ^{(USD 29)} St John 教堂 €30 ^{(USD 32)} 船仔去 Three City €6 ^{(USD 6)} 聖安吉洛堡 €30 ^{(USD 32)} 晚餐 The Black Sheep €56 ^{(USD 59)} 買大水一支 €1.5 ^{(USD 2)} The Seafront Tower 三人房住宿 €71.5 ^{(USD 75)} 是日三人總消費 €236.7 ^{(USD 250)}