巴庫土豪 feel 文化中心
@ Heydar Aliyev Centre Heydər Əliyev Mərkəzi

繼續講下前日未講完嘅Baku行程~ 遊覽完古城之後我哋就坐巴士，去Heydar Aliyev Centre文化中心~ 搭巴士好平，無論去邊都係$0.3AZD($1.4hkd)，唔收現金只收當地八達通。對呢個城市印象好好，唔係因為佢有幾好玩，因為佢啲人真係好熱心友善！每當我地走在街上可能有露出一絲疑惑嘅神情（有時都冇），就會有路人過嚟幫手，其中包括買車票，搵地方等等～假設佢唔順路，就會將你交俾下一手，將你送去目的地😵實在太好人了吧！ Heydar Aliyev Centre文化中心係由名設計師設計而成，流線型嘅外觀非常特別，土豪feel傑作，係baku嘅其中一個地標性建築～我哋冇入去參觀因為當日好似入邊有活動，所以就係外邊睇吓～

睇完之後我哋就諗住搭巴士返回古城，行到去巴士站有少少疑惑個方向係咪錯咗，未睇清楚就巴士到，有一位大媽叫我地快啲上車佢帶我地，咁我哋就跟住上車，一上車我就發現真係坐咗反方向😅好啦唯有坐多陣睇吓係咪循環線～之後多咗個少女主動走埋嚟話要帶我地坐地鐵🚇 大媽即刻向少女表示佢會帶我哋唔使擔心😛如是者我哋跟住大媽搭左幾個站巴士，就去轉坐地鐵，都好，可以體驗下呢度嘅地鐵！ 地鐵去邊都係均一價$0.35AZD，一樣都係用果張八達通，大媽搶住幫我地入錢驚我哋唔識用部機～然後一路帶我地去到月台，再送我哋上車，由於佢本人唔係坐呢架車，佢就走入車廂同其他乘客講我哋要去邊記得叫我地落車，真係好好人呀😂（其實只係坐到總站不複雜的，google可以搞掂）。旁邊嘅乘客冇出聲，一路去到總站嘅時候，先發現旁邊有一個男人原來一路有留意住，去到總站就叫我地落車，但係佢自己又冇落車又要坐返轉頭😵唔通佢係專登送我哋？ 另外講一講，地鐵同莫斯科嘅好相似，感覺好地底，然後車廂冇冷氣會開窗嘅好嘈，整個地鐵設計好蘇聯！