巴库土豪 feel 文化中心
@ Heydar Aliyev Centre Heydər Əliyev Mərkəzi

继续讲下前日未讲完嘅Baku行程~ 游览完古城之后我哋就坐巴士，去Heydar Aliyev Centre文化中心~ 搭巴士好平，无论去边都系$0.3AZD($1.4hkd)，唔收现金只收当地八达通。对呢个城市印象好好，唔系因为佢有几好玩，因为佢啲人真系好热心友善！每当我地走在街上可能有露出一丝疑惑嘅神情（有时都冇），就会有路人过嚟帮手，其中包括买车票，揾地方等等～假设佢唔顺路，就会将你交俾下一手，将你送去目的地😵实在太好人了吧！ Heydar Aliyev Centre文化中心系由名设计师设计而成，流线型嘅外观非常特别，土豪feel杰作，系baku嘅其中一个地标性建筑～我哋冇入去参观因为当日好似入边有活动，所以就系外边睇吓～

睇完之后我哋就谂住搭巴士返回古城，行到去巴士站有少少疑惑个方向系咪错咗，未睇清楚就巴士到，有一位大妈叫我地快啲上车佢带我地，咁我哋就跟住上车，一上车我就发现真系坐咗反方向😅好啦唯有坐多阵睇吓系咪循环线～之后多咗个少女主动走埋嚟话要带我地坐地铁🚇 大妈即刻向少女表示佢会带我哋唔使担心😛如是者我哋跟住大妈搭左几个站巴士，就去转坐地铁，都好，可以体验下呢度嘅地铁！ 地铁去边都系均一价$0.35AZD，一样都系用果张八达通，大妈抢住帮我地入钱惊我哋唔识用部机～然后一路带我地去到月台，再送我哋上车，由于佢本人唔系坐呢架车，佢就走入车厢同其他乘客讲我哋要去边记得叫我地落车，真系好好人呀😂（其实只系坐到总站不复杂的，google可以搞掂）。旁边嘅乘客冇出声，一路去到总站嘅时候，先发现旁边有一个男人原来一路有留意住，去到总站就叫我地落车，但系佢自己又冇落车又要坐返转头😵唔通佢系专登送我哋？ 另外讲一讲，地铁同莫斯科嘅好相似，感觉好地底，然后车厢冇冷气会开窗嘅好嘈，整个地铁设计好苏联！