全港最舒適嘅 ifc 商場育嬰室，去過已經返唔到轉頭
@ 國際金融中心商場

香港站出站之後，直衝上 ifc mall 三樓 (南翼) 利苑酒家附近，發現咗個育嬰室（ifc 官網 floorplan 上面冇講嘅；另外三個育嬰室分別在北翼 L1, L2, L3）。星期日下晝四點喎，竟然冇人，發達啦～男廁個清潔服務員仲戥我哋高興添。

行到門口，好認真咁望住育嬰室個 cam 等佢確認身份。點知唔該都未講門就開咗。 間房好大好舒服，播住柔和嘅音樂，但冇分間隔（如果有人咪要等好耐？）。撳掣，門竟然即刻鎖咗！（試過幾次唔同地方用揚手感應開關，揚極都鎖唔到門，所以覺得鎖到門並唔係必然嘅。）門柄係隱藏式，要用手指篤落去先可以攞到個把手。設計師應該係有簡約主義嘅強迫症。牆角、枱角、掛鉤全部都係圓角設計。育嬰枱係離地嘅，唔會踢腳（點解唔整埋圓角地腳線呢？）。

掛好袋、泊好車。溫度唔啱咩？冷氣可以調校嘅。搞咁耐究竟開始食奶未呢？其實老婆一早已經餵緊，有位置托手好似好舒服咁。

（下刪10分鐘...) 話咁快阿b已經食完，掃埋風。枱面幾乾淨咁冇乜污跡，仲有唔係幾環保嘅即棄換片墊。終於有一部開着咗嘅濕紙巾機，滿心歡喜。點知寫住個E字，error 呀大佬，從來冇遇過work嘅。 就係咁，阿b厭奶幾個禮拜以來第一次喺街度順利飲奶！