厌倦办公室的虚伪与吹嘘，希望有日能寓旅行于工作。
2020年1月21日
全港最舒适嘅 ifc 商场育婴室，去过已经返唔到转头
@ 国际金融中心商场
香港中环
购物中心
一二三四五六日10:00 - 22:00
新手爸妈带初生b出街一啲都唔易，由原本「食买玩」变成一路上要「食训疴」，最好都系留喺有育婴室嘅商场。今次想同阿b搭渡轮出海，拣咗 ifc 作为中转站，据闻呢度除咗可以 gathering 之外，仲有保安严密嘅育婴室，要确认身份先入得。
香港站出站之后，直冲上 ifc mall 三楼 (南翼) 利苑酒家附近，发现咗个育婴室（ifc 官网 floorplan 上面冇讲嘅；另外三个育婴室分别在北翼 L1, L2, L3）。星期日下昼四点㖞，竟然冇人，发达啦～男厕个清洁服务员仲戥我哋高兴添。
行到门口，好认真咁望住育婴室个 cam 等佢确认身份。点知唔该都未讲门就开咗。
间房好大好舒服，播住柔和嘅音乐，但冇分间隔（如果有人咪要等好耐？）。揿掣，门竟然即刻锁咗！（试过几次唔同地方用扬手感应开关，扬极都锁唔到门，所以觉得锁到门并唔系必然嘅。）门柄系隐藏式，要用手指笃落去先可以攞到个把手。设计师应该系有简约主义嘅强迫症。墙角、枱角、挂钩全部都系圆角设计。育婴枱系离地嘅，唔会踢脚（点解唔整埋圆角地脚线呢？）。
挂好袋、泊好车。温度唔啱咩？冷气可以调校嘅。搞咁耐究竟开始食奶未呢？其实老婆一早已经喂紧，有位置托手好似好舒服咁。
（下删10分钟...)
话咁快阿b已经食完，扫埋风。枱面几干净咁冇乜污迹，仲有唔系几环保嘅即弃换片垫。终于有一部开着咗嘅湿纸巾机，满心欢喜。点知写住个E字，error 呀大佬，从来冇遇过work嘅。
就系咁，阿b厌奶几个礼拜以来第一次喺街度顺利饮奶！
