現職空姐，工餘時間不停去旅行，捐窿捐罅四圍走
1 Nov 2019
抓住夏天的尾巴，十月暢遊地中海上的藍色小島國馬耳他
好多日冇嚟update，因為啱啱放大假去左地中海島國馬耳他+土耳其✈️返嚟再返左幾日工，依家終於有時間寫下字～
呢個假期合共玩咗10日，扣減頭尾坐飛機嘅時間，實玩五日馬耳他🇲🇹+兩日土耳其🇹🇷
馬耳他屬於歐盟，係權力遊戲嘅拍攝地，面積比香港更細，由三個小島組成，位於意大利西西里島嘅下面，亦被稱為地中海上嘅心臟～Google Maps 要放到好大先見到佢😂由於地方唔大，可以坐巴士或者自駕遊覽成個國家，橫跨成個島唔使一個鐘頭車程，真係好細👀
馬耳他算係比較少香港人去嘅歐洲小眾旅遊國家（不過係歐洲人熱門到㗎避寒勝地），中國同埋香港遊客都唔算多～全國英語流通，用歐羅，但係消費冇西歐地方咁高，我哋今次唔算窮遊慳錢，餐餐都出去食亦無住過hostel，五日人均總消費都只係 $2975hkd。
10月份歐洲地方大部份都開始凍，但係馬耳他仲係夏天！日日背心短褲游水都唔係問題🌊☀️（不過溫差好大夜晚好涼）11月日間20度左右，11-2月冬季落雨嘅日子比較多，大概係一個月七日左右。我10月份去，五日只有一日陰天落咗一下微微雨，其餘大部份時間都係大晴天。
馬耳他主要來講就係兩種色調，黃及藍～黃色嘅古蹟城堡同埋古城，另外著名嘅馬耳他三藍包括：藍湖，藍窗，藍洞～想悠閒去歐洲享受陽光與海灘+參觀古城古蹟，又唔想同大媽迫，馬耳他係一個唔錯嘅選擇！
今日講到呢度先，放幾張相 preview 一下，之後幾篇，會詳細講述馬耳他攻略及遊記👣
