现职空姐，工余时间不停去旅行，捐窿捐罅四围走
2019年11月1日
抓住夏天的尾巴，十月畅游地中海上的蓝色小岛国马耳他
好多日冇嚟update，因为啱啱放大假去左地中海岛国马耳他+土耳其✈️返嚟再返左几日工，依家终于有时间写下字～
呢个假期合共玩咗10日，扣减头尾坐飞机嘅时间，实玩五日马耳他🇲🇹+两日土耳其🇹🇷
马耳他属于欧盟，系权力游戏嘅拍摄地，面积比香港更细，由三个小岛组成，位于意大利西西里岛嘅下面，亦被称为地中海上嘅心脏～Google Maps 要放到好大先见到佢😂由于地方唔大，可以坐巴士或者自驾游览成个国家，横跨成个岛唔使一个钟头车程，真系好细👀
马耳他算系比较少香港人去嘅欧洲小众旅游国家（不过系欧洲人热门到㗎避寒胜地），中国同埋香港游客都唔算多～全国英语流通，用欧罗，但系消费冇西欧地方咁高，我哋今次唔算穷游悭钱，餐餐都出去食亦无住过hostel，五日人均总消费都只系 $2975hkd。
10月份欧洲地方大部份都开始冻，但系马耳他仲系夏天！日日背心短裤游水都唔系问题🌊☀️（不过温差好大夜晚好凉）11月日间20度左右，11-2月冬季落雨嘅日子比较多，大概系一个月七日左右。我10月份去，五日只有一日阴天落咗一下微微雨，其余大部份时间都系大晴天。
马耳他主要来讲就系两种色调，黄及蓝～黄色嘅古迹城堡同埋古城，另外著名嘅马耳他三蓝包括：蓝湖，蓝窗，蓝洞～想悠闲去欧洲享受阳光与海滩+参观古城古迹，又唔想同大妈迫，马耳他系一个唔错嘅选择！
今日讲到呢度先，放几张相 preview 一下，之后几篇，会详细讲述马耳他攻略及游记👣
