幾千蚊平玩馬爾代夫一星期小攻略 - 傳統度假村篇

#窮遊

出發吧｜旅魔頭 / Kaafu Atoll

現職空姐，工餘時間不停去旅行，捐窿捐罅四圍走

29 Nov 2019

Contents

個個都問我點樣可以窮玩馬爾代夫，呢幾年我都窮遊左幾次馬代，所以今日就詳細啲講一講。簡單來說有兩種方法，方法一平玩，方法二窮遊~ 方法一（budget 約 $6000 HKD (USD 771) 一星期，所有消費唯一不含機票)： 傳統方式，住一島一resort渡假村，不過選擇近嘅同埋平嘅島。非旺季去一星期可以控制到 $6000 HKD (USD 771) 內（不含機票），呢種方法只可以講係平玩，未談得上窮遊～好處就係包餐，同享受hea resort嘅樂趣~仲可以選擇有水上屋嘅渡假村添.. 方法二：(budget 約 $3000 HKD (USD 385) - 4000 HKD (USD 514) 一星期，不含機票) 入住居民島，島上有林林總總小型旅館民宿之類($300 HKD (USD 39) - 500 HKD (USD 64) 一晚雙人房都有不少選擇)，再由旅館幫你安排活動，活動包括有:浮潛、睇海豚🐬、sand bank tour、無人島、夜釣及到resort一日遊等。一星期budget 約$3000 HKD (USD 385) - 5000 HKD (USD 642)（好睇吓你會參加啲咩活動，我上次就一星期用咗$3000食住活動），好處就係活動多元化d，但係住宿條件就基本啲唔好有啲咩要求，就冇resort嗰種高級感，島本身無咁好hea，但勝在活動多同平價~
幾千蚊平玩馬爾代夫一星期小攻略 - 傳統度假村篇

序

陽光與海灘我嚟喇☀️🏝 出發喇！椰林樹影水清沙幼嘅馬爾代夫，我又來了😝 過咗唔平靜嘅兩個月，終於放大假出去抖下氣，今次係我第N次去馬代，唔計返工停留嗰幾次，之前兩次放假去渡假嘅馬爾代夫之旅都係住cheap cheap居民島，一次係窮遊居民島maafushi ，另一次係早兩年帶埋父母去居民島Hangnaameedhoo，一個星期都只係洗咗$3000hkd😛 馬爾代夫真係好好玩！去好多次都唔厭，海島假期來講真係冇得輸~ 今次玩法唔同喇，今次我玩豪d，住返傳統嘅一島一resort，不過係最平價嘅resort，住宿條件上雖然豪華（我都冇要求），但係珊瑚礁質素係屬於A級，最適合去浮潛睇魚！ 今次一行九人（又超多人😅），八日行程會玩兩個唔同嘅resort島～budget約$6000hkd一星期🤗帶左唔少嘢飲嘢食，慳返啲錢~ 好喇唔寫，上機了👋🏻之後再匯報✌🏻 伊朗遊記仲未完仲有兩三篇，都係之後再續~ (配圖係之前嘅窮遊馬代影嘅)
✌🏻✌🏻
✌🏻✌🏻
椰林樹影
椰林樹影
水清沙幼
水清沙幼

先講方法一：平玩resort

馬爾代夫係由好多個小島組成，傳統馬爾代夫玩法就係住一島一渡假村，價錢方面有好多唔同檔次，有高級有平價，配套及環境各有不同。貴嘅我唔講，因為我係窮L唔會住~ 先講一個重點，平resort都有d選擇嘅，但交通係一個好重要嘅考慮，如果日數唔係太多，想慳錢就一定要住距離機場唔太遠嘅 North Male Atoll / South male Atoll / Ari Atoll，重點就係能夠坐快艇到達（快艇一般係 $100 USD - 200 USD /人，其實都唔係平），因為島一遠需要坐水上飛機/轉內陸機嘅話，交通成本就會多二千蚊左右一個人~ 交通方面如果人多嘅話直頭可以自己包一條快艇，唔用酒店本身嘅船，咁樣交通費就可以更加平！舉個例子，好似我今次住兩個唔同嘅resort，Thulhagiri +eriyadu ，本來交通費要每人 $100 USD + 150 USD 來回，由於我有九個人，我就自己包左隻快艇🚤就算去兩個島，合 共$147 USD /人，足足每人慳左$100 USD 有多~（大前提係要有咁多人先得😂） 再講下有乜平resort選擇（我平嘅定義係 $2000 HKD (USD 257) 以下雙人房，包所有稅項附加費+早餐及晚餐🥣） 浮潛出名好嘅島有:
  • Smartline eriyadu 早晚 $1061 HKD (USD 136) /晚 快艇 $150 /人
  • Fihalhohi island resort 早晚 $1246.8 HKD (USD 160) /晚 快艇 $150 USD /人
  • Biyadhoo island resort 中午晚 $1119 HKD (USD 144) /晚 快艇
  • Bandos Maldives
  • Thulhagiri island resort & spa 早晚 $1598 /晚 快艇 $100 USD /人
  • Embudu village resort
  • Ellaidhoo Maldives by Cinnamon
珊瑚礁唔好，浮潛無乜魚睇，但水色靚嘅島，如果對浮潛冇要求就可以考慮:
  • Kurumba Maldives
  • Adaaran club rannalhi
  • Paradise island resort
一行9人，一大班人玩最開心，分攤返交通費平好多~(今朝好多雲，水色冇咁靚)
一行9人，一大班人玩最開心，分攤返交通費平好多~(今朝好多雲，水色冇咁靚)
航拍影嘅，成隻曱甴咁😂 Thulhagiri island resort & spa ，有水上屋，算係性價比最高嘅水上屋雙人房$2778一晚，沙灘屋就$1598hkd，仲要包早晚兩餐，算係抵住！
航拍影嘅，成隻曱甴咁😂 Thulhagiri island resort & spa ，有水上屋，算係性價比最高嘅水上屋雙人房$2778一晚，沙灘屋就$1598hkd，仲要包早晚兩餐，算係抵住！
水下世界一樣精彩，有見到鯊魚同魔鬼魚
水下世界一樣精彩，有見到鯊魚同魔鬼魚
由於我今日先係平玩嘅第四日，仲未有總支出實數，而家估計一星期總消費 $5000 HKD (USD 642) - 6000 HKD (USD 771)，機票我asiamiles換，所以千幾蚊啫（機票有時特價正價都係二千幾）..玩完再詳細匯報確實洗咗幾多錢啦 另外想知有關居民島有咩玩，可以睇返我舊網誌文章（ https://m.xuite.net/blog/kwokjoanne/hkblog ），之前曾經有寫 maafushi 島，居民島其實有好多個，我第二次去去咗 hangnaameedhoo（未寫返😝）~仲有 gulhi 等等，都有不少選擇，其中最受歡迎都係 maafushi ～ 總結嚟講，馬爾代夫並冇世人想像中咁貴，平民都玩得起！兩種平玩嘅方式各有好處，要睇返你有咩要求同budget~再選取返適合嘅方法~
Thulhagiri 水上屋外面
Thulhagiri 水上屋外面
Thulhagiri 水上屋落水，水唔深又好清
Thulhagiri 水上屋落水，水唔深又好清
Thulhagiri 水上屋，$2778港幣一晚兩位，包早晚兩餐自助餐，屋仔非常有特色，連續四間屋仔都係我哋嘅朋友😛可以嗌過隔離
Thulhagiri 水上屋，$2778港幣一晚兩位，包早晚兩餐自助餐，屋仔非常有特色，連續四間屋仔都係我哋嘅朋友😛可以嗌過隔離
Eriyadu無敵嘅水上世界，超級多魚，而且好近沙灘唔使游太遠
Eriyadu無敵嘅水上世界，超級多魚，而且好近沙灘唔使游太遠
Eriyadu我嘅房門外，一行出黎就係呢個位置
Eriyadu我嘅房門外，一行出黎就係呢個位置
Eriyadu我就係住綠色呢幢，我住樓下一行出黎就可以到沙灘，重點係超平，$1052hkd兩人一晚，包早晚兩餐自助餐~真係好抵住
Eriyadu我就係住綠色呢幢，我住樓下一行出黎就可以到沙灘，重點係超平，$1052hkd兩人一晚，包早晚兩餐自助餐~真係好抵住
一行9人😛呢個係eriyadu嘅碼頭，成日都好多鯊魚聚集，可以由呢個位直接跳落水浮潛，環島一周，超正！
一行9人😛呢個係eriyadu嘅碼頭，成日都好多鯊魚聚集，可以由呢個位直接跳落水浮潛，環島一周，超正！

八日六晚雙島遊 - 消費明細大公開

八日馬爾代夫之旅終於完結，掛住玩之後返嚟又忙返工，都冇時間上嚟update下，依家終於計埋條數，可以喺度同大家分享下～六晚總消費係$6351hkd~整體來說性價比超高！（不含機票，因為個個機票唔同價錢，我asiamiles換就千幾，同行朋友最貴買airasia就$3000） 再講多次今次並唔係住超平嘅居民島，我要瞓醒一擘大眼就要見到海👀所以入住兩間cp值超高嘅平resort，合共入住左三間唔同嘅酒店，全部都係Agoda訂(比較左好多個平台佢最平)🏨一晚機場島，三晚Thulhagiri island resort (一晚水上屋，兩晚沙灘屋)，兩晚smartline eriyadu resort～ 兩個島都非常值得推介，首先距離機場唔算太遠坐船可以到達，慳返d交通費唔使坐水上飛機咁貴~ 第二Thulhagiri同eriyadu非常適合鍾意水上活動嘅朋友~兩個島都係潛水屬於A級嘅島，house reef好好，魚群品種繁多，島上浮潛都超多魚睇，完全唔需要再花錢出去參加浮潛tour，珊瑚礁範圍好大，要游幾日先睇得完~呢方面同行八個朋友都非常滿意，日日都浮潛睇到唔同嘅海洋生物~鯊魚海龜魔鬼魚等等...海洋世界充滿驚喜! 第三就梗係價錢平啦，尤其eriyadu，海洋生態非常好，碼頭就可以見到好多鯊魚~雙人房一晚都只係$1052 HKD (USD 135)，仲要包早晚兩餐buffet(食兩餐buffet都幾百蚊了吧，五百幾蚊一人一晚，其實真係好平)！不過佢唯一唔好處就係冇水上屋(唔追求豪華，鍾意玩活動嘅呢樣其實唔重要😛） Thulhagiri就有屬於比較平嘅水上屋，$2778 HKD (USD 357) 一晚，都係早晚兩餐buffet~水上屋的確係比較特色嘅，房間全海景，行出去有露台可以直接落水~值得體驗一晚！不過其實佢沙灘屋一樣咁正，直接望住個海灘，一樣行出去就落到水，都只係$1596 HKD (USD 205) 一晚兩位包兩餐~
古怪嘅角度😂航拍的確係好物
古怪嘅角度😂航拍的確係好物
同行朋友租左隻直立板玩，$25usd一小時，睇落好過癮我都想玩
同行朋友租左隻直立板玩，$25usd一小時，睇落好過癮我都想玩

慳錢小貼士

-選擇half board包早晚兩餐豐富嘅自助餐，午餐自己準備響房食(我有半個喼都係食物同埋飲品），帶定啲乾糧呀杯麵福面罐頭等等食物，下午可以食得隨便啲嘅～ -浮潛三寶及救生衣/水泡自己淘寶買定，上島租要十幾蚊美金一日 -島上一日有提供兩支細水，但係唔夠飲，所以上島前响機場買定幾支大水，帶上島慢慢飲 -晚餐buffet都係唔包飲品，島上酒水都比較貴，例如可樂要$4美金，即係差唔多$30HKD (USD 4)一罐可樂，所以自己買上去，忍一陣返房飲啦😛

有關交通

補充多兩句先，因為我人多所以我先獨立包左一條船，冇使用酒店嘅船，機場去Thulhagiri $200usd+Thulhagiri 去eriyadu$500usd+eriyadu返機場$500USD。 呢個係人多嘅做法~同時我亦方便轉島，唔使坐多一程返機場。 但係如果冇咁多人，就可以坐返酒店本身提供嘅船，Thulhagiri 來回機場係$100USD一位，eriyadu來回機場係$175USD一位，所以都未至於係天價嘅~兩程加埋都係2000HKD (USD 257)多少少，都算可以接受，不過如果人少日數又唔多，想慳錢嘅話就住一間resort，咁就唔使比兩間酒店嘅船費～ 總結嚟講，馬爾代夫其實冇想像中咁貴，同去一次日本差唔多價錢，但係嗰一片海真係無得輸～真係百去不厭！

馬爾代夫8日6夜消費明細

六晚住宿費用:(total$4280 HKD (USD 550)) 機場島酒店Coral queen inn雙人房$62USD含早餐$31USD/人=$243HKD (USD 31) Thulhagiri水屋一晚 雙人房含早晚餐$12499.44四間房/9人=$1389HKD (USD 178) Thulhagiri 沙屋兩晚 雙人房含早晚餐 $14358.16四間房/9人=$1596HKD (USD 205) Eriyadu沙屋兩晚 雙人房含早晚餐 $8415.77四間房/8人=$1052HKD (USD 135) 交通：(total$1181HKD (USD 152)) 三程包船費$1200USD/9=$148USD (*我哋包左一條船，如果人唔多就使用返酒店嘅船會平啲，Thulhagiri $100USD/人來回，eriyadu$175USD來回，詳情參考返上面交通部份） 第一晚機場去機場島酒店的士$13USD/9人=12HKD (USD 2) 第二日機場島去碼頭$10USD/9人=$9HKD (USD 1) 雜費：(total$890HKD (USD 114)) 第一晚機場晚餐thai express$25USD/2 =$98/人 第二日上島前買飲品$3USD/2人=12HKD (USD 2) 多日合共小費$4USD/人 =31HKD (USD 4) 最後一晚機場晚餐Thai express $13USD=102HKD (USD 13) Eriyadu 島出海釣魚活動$55.5USD=$442HKD (USD 57) 釣魚煮魚午餐加工費$18/8人=$18HKD (USD 2) Late checkout 費用$49.28USD/4人(最後一個下午，只留下兩個房間休息及沖涼用)=$98HKD (USD 13) Eriyadu午餐$22.17USD/2=$88HKD (USD 11) 機票:($1306HKD (USD 168)) Hkg-mle(hx) $330(航空公司職員價錢，呢個單程價錢未能提供參考) Mle-hkg(cx asiamile)$976HKD (USD 125) 全程總消費:$7647HKD (USD 982) 之後我會分兩篇再介紹下呢兩個resort~~
 * * * article collected under 出發吧｜旅魔頭 / Kaafu Atoll * * *
Next: 馬爾代夫 Eriyadu 及 Thulhagiri 島的海洋生態篇 🐠🐟🐬🐳


Comments