404 不存在的国家 - 纳戈尔诺卡拉巴赫 Nagorno Karabakh (两日一夜)，得来不易的独立与和平 - 阿尔札赫 - 出发吧｜旅魔头的博客

高加索行程嘅第10日，我参加左一个两日一夜嘅当地旅行团，前往实质独立但不被国际承认，不存在嘅国家-纳卡🌍今篇好长，但系太多野要交代，冇办法短🤦🏾‍♀️关于纳卡网上中文旅游资料好少，所以我希望呢篇可以比嚟紧要去嘅人参考返～

国家背景

纳戈尔诺-卡拉巴赫共和国系佢嘅全名（简称纳卡或 Artsakh），意为山地中的要塞花园。苏联解体之后，纳卡地区亦引发亚美尼亚同阿塞拜疆嘅领土争端。经历多次战争，1991年纳卡公投宣布正式独立，佢依家拥有自己嘅国旗、士兵（多为亚美尼亚人）同埋签证等，但一直未被联合国承认。国内人口>80%为亚美尼亚人，亦能使用亚美尼亚货币，唯一连接纳卡嘅道路亦需由亚美尼亚前往🇦🇲但系偏偏被国际承认为阿塞拜疆嘅一部份，实在系非常讽刺，阿美尼亚及纳卡双方都好希望有朝一日可以统一，但系呢个梦想相信短期内都难以实现... 其实高加索地区受到争议嘅404国家有几个（另有阿布哈兹及南奥塞梯），不过其他都唔系好适合旅游，纳卡算系相对地安全稳定，同埋山区风景唔错亦都多啲野睇～有深厚嘅历史文化，去亚美尼亚嘅同时，值得用两日或者三日时间前往游览。

有关高加索国家行程次序安排

亚美尼亚同埋阿塞拜疆虽然有好大面积范围嘅土地接壤，但系系完全冇关口可以过境，因为佢哋系敌人，所以如果想玩齐高加索三国，行程编排通常为：阿塞拜疆-格鲁吉亚-亚美尼亚🇦🇲，又或者调返转，一定要将格鲁吉亚摆喺中间。然后若有迹象显示，曾经去过纳卡地区，阿塞拜疆会禁止入境（入境表一定要写冇去）⛔️所以若三国同游，建议行程安排要去咗阿塞拜疆先，亚美尼亚对有阿塞拜疆出入境记录嘅游客管得唔严，但如果调返转就会俾人问好多问题～(虽然纳卡签证系一张纸，可以来无踪去无影，所以调返转其实都冇话唔得嘅）

前往纳卡方法

可以响亚美尼亚首都叶里温参加两日或者三日旅行团，又或者自行搭车前往，到达当地再包车。我选择跟旅行团因为纳卡景点分散，如果自己去可能好多景点去唔到，而且大部份景点都系嗰啲修道院，跟旅行团会有导游英文介绍，知道啲历史背景都好重要，然后重点就系跟团好平！两日嘅旅行团只系收费$25000AMD ^{(CNY 478)}($410hkd，包交通住宿导游，非常抵玩，我差不多全部团友都系亚美尼亚人，除咗我哋三个，只有另外一位外国游客）旅行社资料：one way tour（推荐👍🏼有好多亚美尼亚一日游价钱都好抵，而且整体安排都几好）三日纳卡团$25000AMD ^{(CNY 478)}：每逢星期二五有团两日纳卡团$33000AMD ^{(CNY 632)}：每逢星期六有团（图片入边有行程嘅相）呢个圑时间非常之长，一大清早就集合，然后返到阿美尼亚叶里温已经系夜晚12点，所以真系要两个全日！网站： https://onewaytour.com/regular-daily-tours/nagorno-karabakh/

纳卡旅行团第一日行程

第一日行程：didivank-sarsang reservoir-sea stone rocky lion-Vank village-Gandzasar monastery-Matenadaran of Gandzasar-we and our mountain-Stepanakert 上面行程睇落好似好多嘢咁，但系会落车停留介绍嘅景点主要系两个修道院同埋石狮子。 Dadivank Monastery：距离纳卡边境唔远，Dadivank 隐藏山林之中，九曲13弯之后先去到。钟楼、壁画等等都几精美，由于战争时期曾经被一户家庭用作住所（嗰阵佢哋唔信耶稣所以唔重视教堂），教堂墙壁都被烟薰黑，复原后则浮现出精美的壁画，好有艺术价值。 Gandzasar Monastery：距离首都Stepanakert大约30分钟车程。Gandzasar 含义系山顶的宝藏，系一个古老嘅修道院，建设于10-13世纪。 sea stone rocky lion：山边用石造成嘅狮子🦁️好卡通搞笑！上面系比较重要嘅景点，当日黄昏大雨，所以最经典嘅爷爷奶奶山 we and our mountain 改为第二日先去)～

由亚美尼亚首都过嚟纳卡边界，到达纳卡边界大约需要四个钟头车程。边界检查站有两条国旗，一个系亚美尼亚国旗🇦🇲另一支就系纳卡

Dadivank Monastery，距离边界唔系好远嘅修道院。隐藏山林之中，九曲13弯之后先去到。钟楼、壁画等等都几精美，由于战争时期曾经被一户家庭用作住所（嗰阵佢哋唔信耶稣所以唔重视教堂），教堂墙壁都被烟薰黑，复原后则浮现出精美的壁画，好有艺术价值。

Dadivank Monastery，建筑两边嗰个凹位设计系用嚟抗地震，即系折纸嘅道理，咁样会企得稳啲

咁岩有一班学生喺度参观紧，邀请我哋同佢影相😬可能真系比较少亚洲人，我哋嘅存在特别古怪😂

sea stone rocky lion：山边用石造成嘅狮子🦁️好似喺度笑紧好有喜感😬

我哋又系人肉景点喇

到咗黄昏，旅行团将我哋送到首都 Stepanakert 嘅酒店。之后就自由活动，提供嘅酒店都唔错，干净企理。由于餐食自理，所以我哋抵达酒店之后就即刻出去觅食，酒店介绍咗间唔错嘅餐厅俾我哋，去咗就觉得都差不多啦冇乜特别，叫 Ureni Restaurant。之后我哋就喺市区度周围行吓，当日咁啱有一场足球赛，城内市民都去咗睇，我哋又去睇下，谁不知我哋睇波，啲群众就睇我哋🤦🏾‍♀️🤦🏾‍♀️🤦🏾‍♀️可能太少亚洲人，我哋真系好异样，所以个个都系咁打量我哋😅情况同阿塞拜疆有少少相似... 之后夜晚我哋响街周围行，去咗大广场等市区景点，周围都好多人，因为系周末（夜晚感觉都安全），不少人拉住我哋合照，或者上前搭讪话要做朋友....😅😅😅😅好似动物园啲动物咁😆唔讨厌嘅，感觉啲人都几友善嘅～不过都冇乜特别野睇就早啲返去瞓觉了～

入到球场已经十二码，我哋睇波，啲人睇我哋..所以我哋行得好出，费事行入人群入边俾人望住

非法入境惊魂

又有故事要讲🤦🏾‍♀️早上7:00旅行团集合，一早要坐几个钟头车～旅行团嘅车系benz van仔，一团20人左右。我地大约坐左三个钟，导游提醒我哋一阵会去到边境检查站，大家要准备检查证件，外国游客要落车做签证，旅行团免签证费，然后我同行小伙伴忽然间发现自己唔记得带护照😱因为旅行团只去两日，我哋将个箧寄存左系叶里温hostel度，孭住一个小背囊走左，然后小伙伴就唔小心将护照摆咗喺个箧入边，然后带喺身上嘅系旧护照😬 死火🔥即刻通知导游，心谂应该可能要折返冇得去了..谁不知导游同公司沟通之后，叫我小伙伴到咗关口唔好落车，净系我同另外一个落车，佢坐喺车入边扮瞓觉（车系茶色玻璃睇唔到入边嘅，然后检查站士兵都唔会查车），然后佢就竟然成功瞒混过去😅 所以佢系一个非法入境者，街上一见到警察就淆底😂不过最后有惊无险咁留咗喺纳卡两日😬

我同伴唔记得带passport 🤦🏾‍♀️然后喺车上边唔落车，呢张相系佢响车上偷影我哋落去做签证😂佢话佢惊到赖屎，因为下边有啲士兵佢好惊查车

第一日消费

（由于团费前一日交左，所以使得好少钱） D10 8/6 纳卡tour 午餐$2750AMD ^{(CNY 53)} 晚餐$6700AMD ^{(CNY 128)} 水果$140AMD ^{(CNY 3)} 水1.5L$300AMD ^{(CNY 6)} 厕所$600AMD ^{(CNY 11)} Total:$10490AMD ^{(CNY 201)}/3=$3497AMD ^{(CNY 67)}=人均消费$57HKD ^{(CNY 52)}

纳卡旅行团第二日行程

去到高加索嘅第11日，继续探索纳卡呢个特殊、独立却又不被世界认可嘅国家。呢一日行程好丰富，睇嘅除咗自然景色，教堂，仲有啲战争遗迹等等....睇完之后返回亚美尼亚首都，已经夜晚12点😱 纳卡第二日行程: 行山前往 zontikner (umbrella) 雨遮瀑布 - Shushi fortress 及 victory tank 抗战胜利坦克车 - jdrduz 峡谷 - kanach jam church - ghazanchetsots church - Stepanakert 中央市场 - we and our mountain 爷爷奶奶山🏔️

Zontikner (umbrella) 雨遮瀑布

晨咁早就酒店集合，第一站竟然系去行山，死火，我同我朋友仔都系著拖鞋，导游都望住我哋只脚疑惑左一下😂仲要只有一对鞋😅不过后来觉得自己无比英明，因为行到umbrella 嘅时候要湿脚，其他健步如飞嘅团友大家都狼狈又要除鞋，我哋两个就可以就咁爬上去，顺便洗脚😂不过强烈建议都系着返对鞋（除非系着紧拖鞋嘅高手），尾段有啲部份地滑，同埋真系要手脚兼用先可以爬到上去。我哋沿 Hunot canyon，行入去 zontikner (umbrella) 雨遮瀑布，umbrella 系溪流水流入，铺满苔藓嘅雨伞型洞穴，已经形成咗几个世纪，只能够步行前往。系纳卡Shushi 一个好标志性嘅自然景点，非常有趣！来回大约需要行个半钟，几公里左右，我哋一团大约20人，有啲系大年纪嘅阿姐，唔好以为人哋年纪大个个行起山都健步如飞，反而我哋三个成日包尾😅起初大部份山路都唔系话好难，但系尾段都要手脚并用而且会湿水～如果要行入洞边一定会全身湿晒～

zontikner (umbrella) 雨遮瀑布，umbrella 系溪流水流入，铺满苔藓嘅雨伞型洞穴，已经形成咗几个世纪，只能够步行前往。系纳卡 Shushi 一个好标志性嘅自然景点

Shushi Fortress 及 Victory Tank 抗战胜利坦克车

Shushi呢座城市响92年纳卡冲突中系重灾区之一，时至今日路边仍有不少废弃的楼房与战争遗迹。当中有一架T72坦克同埋纪念碑摆放咗喺山边，用以纪念Shushi当年亚美尼亚军队抵抗阿塞拜疆军队，利用山区嘅优势及战术，用坦克车引开敌军，其中三位士兵有两位英勇牺牲（其中一位而家还活着），呢场战役得以胜利。虽然坦克车好似平平无奇，对佢哋人民好有意义，表示左战争后得来不易嘅自由。

victory tank抗战胜利坦克车纪念碑💣 92年嘅战争，其中三位士兵有两位英勇牺牲（其中一位而家还活着），呢场战役得以胜利。虽然坦克车好似平平无奇，对佢哋人民好有意义，表示左战争后得来不易嘅自由。

Jdrduz 峡谷

再之后我哋又有少少行山，去到jdrduz峡谷。Jdrduz悬崖峡谷位于Hounot峡谷自然保护区。有400几米嘅悬崖峭壁，风景如画～一行入去就有一大片雏菊花海，好靓🌼远处见到啲当地人喺度野餐～

Kanach Jam Church 及 Ghazanchetsots Church 两个教堂

Ghazanchetsots 大教堂建于19世纪末，不过之后毁于战乱。如今的教堂系20年前修复，所以好新。教堂成座白色，好现代化。不过好讽刺在于而家呢座教堂出现响阿塞拜疆呢伊斯兰国家名义领土上，相当讽刺😣然后我哋喺入边见到几个士兵喺度参观，几高大威猛咁嘅款😂我哋喺度眼望望佢，佢又喺度眼望望我哋😬最后，佢邀请我哋同佢哋合照，嘻嘻，啱喇其实我哋都想影不过唔好意思出声先😂 另外 Ghazanchetsots 大教堂108前曾经有件美事，就系有675对情侣同时一齐喺呢个教堂结婚，由一位富商赞助呢个婚礼，佢同时亦提供资金比佢哋建立家庭，即系例如生咗小朋友又再俾钱佢哋读书，同埋协助好多当地基建，算系当地嘅一位伟人（不过后来比俄罗斯囚禁两年前死咗），上网可以揾到当年大型婚礼嘅照片，非常壮观！令一个教堂 kanach jam church 又名 "green church"，同上面嗰个一样都系喺shushi入面，同上面嗰个好近，但系呢个比较细，一样都系新式嘅教堂。由于已经睇得好多教堂，所以细嘅都冇乜认真睇了～

Ghazanchetsots 大教堂⛪️ 我哋喺入边见到士兵喺度参观，几高大威猛咁嘅款😂我哋喺度眼望望佢，佢又喺度眼望望我哋😬最后，佢邀请我哋同佢哋合照，嘻嘻，啱喇其实我哋都想影不过唔好意思出声先😂

Stepanakert Central Market 中央市场

其实系类似一个街市咁，有蔬菜水果干果等摊档。午餐我哋喺度解决，食咗一个「茜饼」正名为zhingyalov Hats，系当地特色小食，芫荽及其他香菜馅饼🥙钟意食芫荽嘅人嘅福音，我同伴嘅地狱😂$500AMD ^{(CNY 10)}($8hkd一大个)，味道唔错好香，我几钟意食😂 另外仲有一只当地水果，mulberry 白莓，虽然其貌不扬，生到成条虫咁嘅样，但系真系好好食呀！好甜~~~不过要尽快食晒佢，因为好容易烂！

一只当地水果，mulberry 白莓，虽然其貌不扬，生到成条虫咁嘅样，但系真系好好食呀！好甜~~~不过要尽快食晒佢，因为好容易烂！

食咗一个「茜饼」正名为zhingyalov Hats，系当地特色小食，芫荽及其他香菜馅饼🥙钟意食芫荽嘅人嘅福音，我同伴嘅地狱😂$500AMD ($8hkd一大个)，味道唔错好香，我几钟意食😂

We and our mountain 爷爷嫲嫲山

冇去过爷爷嫲嫲山We and our mountain就等于冇去过纳卡！！呢个系最地标性嘅景点，没有之一！响Stepanakert 首都周边一座小山上边，一对年老夫妇嘅半身雕像，用火山岩雕刻而成🗿雕像系只有半身冇脚嘅，以此表达植根在自己土地上嘅人民精神！好有象征式嘅意义~系国家象征！由于我哋旅行团架车坏咗要去维修，所以我哋三个自己搭的士先过嚟玩～我好彩，当日撞到一对银乐队专登过嚟影相！俾我哋捕捉到佢😛 然后爷爷嫲嫲山下边有好多小贩档，我觉得呢度系最适合买记念品，因为最多，有磁石、木雕等等小商品～

之后去到纳卡地标 - 爷爷嫲嫲山 we and our mountain ，遇到一队银乐队

we and our mountain ，表达植根在自己土地上嘅人民精神！平时啲Pose有啲闷，所以我用一个唔同嘅角度出现😂

冇去过爷爷嫲嫲山We and our mountain就等于冇去过纳卡！！呢个系最地标性嘅景点，没有之一！

第二日消费

D11 9/6 纳卡tour 可乐一支$340AMD ^{(CNY 7)} 纪念币三个$3000AMD ^{(CNY 57)} 磁石三个$3500AMD ^{(CNY 67)} 厕所$300AMD ^{(CNY 6)} 可乐一支$300AMD ^{(CNY 6)} 香草饼$500AMD ^{(CNY 10)} 士多啤梨一盒$700AMD ^{(CNY 13)} Mulberry 一盒$500AMD ^{(CNY 10)} 之后三晚住宿$34830AMD ^{(CNY 667)} Kyle磁石两个$2000AMD ^{(CNY 38)} 天使吊饰一个$2000AMD ^{(CNY 38)} 我磁石一个$1000AMD ^{(CNY 19)} 热狗+薯条$1500AMD ^{(CNY 29)} 鸡卷两个$1700AMD ^{(CNY 33)} 的士去爷爷奶奶山$800AMD ^{(CNY 15)} Total:$52970AMD ^{(CNY 1,014)}/3=$17657AMD ^{(CNY 338)}=人均消费$289hkd（比较多系因为一次过交左三日嘅住宿费）

总结

我觉得而家嘅纳卡值得一去，主要系因为佢特别嘅历史，而且未来可能有一日纳卡会同亚美尼亚合并，而家应该要抓紧机会去睇下呢个仲系「国家」嘅纳卡，同埋佢地来之不易嘅独立及和平。写在最后，纳卡呢个国家虽然得唔到世界嘅认同，但独特嘅历史文化，去亚美尼亚嘅同时值得抽两三日一去。祝愿纳卡有一日可以得到真正和平，人民能够得偿所愿回归亚美尼亚嘅怀抱🤲

* * * 文章收录于出发吧｜旅魔头 / 阿尔札赫 * * *

404 不存在的国家 - 纳戈尔诺卡拉巴赫 Nagorno Karabakh (两日一夜)，得来不易的独立与和平

目录