《埃及‧随想随写》- 神秘的金字塔

黎到埃及，最期待当然系睇金字塔同埋狮身人面像。呢个可以话系小编由细到大的梦想之一。金字塔系埃及大约有80至110座，而当中最出名就系位于吉萨地区金字塔群，而当中包括成日出现系旅游片或介绍埃及的三座金字塔，分别系胡夫金字塔、卡夫拉金字塔及门卡拉金字塔，而当中最大系胡夫金字塔，同时被誉为世界七大奇迹之一。 其实金字塔系法老王及王后的陆墓，而当日去到吉萨地区望到三座金字塔后，发觉比想像中宏伟，心谂几千年前点解可以起到呢座野，而家仲可以屹立不倒，不过由于金字塔身处系沙漠地带，所以金字塔的表面不断受到风沙侵蚀，最终有一日都会倒下来，所以建议大家有得睇就衬早了。 另外来到金字塔，当然想学当时《The Mummy》咁闯入金字塔里面，睇下里面系咪真系黑到要拎火把先行到。呢度有个好有趣的分享，原来埃及政府会每天决定开三个金字塔当中的其中一个，甚至有可能唔开，事前就要问定当地导游。咁我去那天就开放左第二大的卡夫拉金字塔，算系不过不失吧! 而里面的路需要弯住行，而光线系比较微弱，但因为前后都会有人系度，跟住行问题不大。 而参观金字塔亦包括骑骆驼，虽然惊惊地会中MERS，但黎到无理由唔试下骑。骑骆驼比骑马更加难，主要系骆驼的脚较长，虽然一开始会坐低俾你骑上去，但系骆驼起身一下就会发觉好高下，好彩全程有当地人带路，所以全程都算安全。不过当地我与其他游客都有些不愉快的经历，就系带路人会全程「笑骑骑」，又帮埋你影相，教你摆pose，原来最后真系「放毒蛇」问你拎贴士。讲真，一开始虽然话唔需要俾，但我本身都预左，但估唔到俾左几蚊美金之后佢仲贪得无厌，唔肯放我地走，好彩最后有些当地导游帮我及其他游客解围。 而最后一个行程就系睇埋狮身人面像，反而比想像中细，而当中个鼻同胡须已经脱落，相传系俾拿破仑攻打埃及时破坏，但未得到历史学家证实。我觉得金字塔的确值得一生人要黎一次去睇，当中的宏伟要黎到现场亲身感受一下先得。