《埃及‧隨想隨寫》- 神秘的金字塔

黎到埃及，最期待當然係睇金字塔同埋獅身人面像。呢個可以話係小編由細到大的夢想之一。金字塔係埃及大約有80至110座，而當中最出名就係位於吉薩地區金字塔群，而當中包括成日出現係旅遊片或介紹埃及的三座金字塔，分別係胡夫金字塔、卡夫拉金字塔及門卡拉金字塔，而當中最大係胡夫金字塔，同時被譽為世界七大奇蹟之一。 其實金字塔係法老王及王后的陸墓，而當日去到吉薩地區望到三座金字塔後，發覺比想像中宏偉，心諗幾千年前點解可以起到呢座野，而家仲可以屹立不倒，不過由於金字塔身處係沙漠地帶，所以金字塔的表面不斷受到風沙侵蝕，最終有一日都會倒下來，所以建議大家有得睇就襯早了。 另外來到金字塔，當然想學當時《The Mummy》咁闖入金字塔裏面，睇下裏面係咪真係黑到要拎火把先行到。呢度有個好有趣的分享，原來埃及政府會每天決定開三個金字塔當中的其中一個，甚至有可能唔開，事前就要問定當地導遊。咁我去那天就開放左第二大的卡夫拉金字塔，算係不過不失吧! 而裏面的路需要彎住行，而光線係比較微弱，但因為前後都會有人係度，跟住行問題不大。 而參觀金字塔亦包括騎駱駝，雖然驚驚地會中MERS，但黎到無理由唔試下騎。騎駱駝比騎馬更加難，主要係駱駝的腳較長，雖然一開始會坐低俾你騎上去，但係駱駝起身一下就會發覺好高下，好彩全程有當地人帶路，所以全程都算安全。不過當地我與其他遊客都有些不愉快的經歷，就係帶路人會全程「笑騎騎」，又幫埋你影相，教你擺pose，原來最後真係「放毒蛇」問你拎貼士。講真，一開始雖然話唔需要俾，但我本身都預左，但估唔到俾左幾蚊美金之後佢仲貪得無厭，唔肯放我地走，好彩最後有些當地導遊幫我及其他遊客解圍。 而最後一個行程就係睇埋獅身人面像，反而比想像中細，而當中個鼻同鬍鬚已經脫落，相傳係俾拿破侖攻打埃及時破壞，但未得到歷史學家證實。我覺得金字塔的確值得一生人要黎一次去睇，當中的宏偉要黎到現場親身感受一下先得。