亚美尼亚包车一日游 - Geghard 格加尔德修道院 + Garni 加尼神庙 + 叶里温阶梯

格加尔德修道院 Geghard⛪️

Geghard 意思系「圣矛」，系隐藏喺峡谷入边嘅世界文化遗产，历史悠久，距离市区大约40公里，唔系好远。传说耶稣钉十字架之前，士兵用矛刺过耶稣身体。据说修建呢个修道院嘅目的就系为咗收藏「圣矛」，修道院建筑从山岩中开凿而成，石雕非常精美，内部结构好似石窟，入边有多个石室，采光主要靠顶部天窗同埋侧边嘅石窗，好黑，行入去好似盗墓迷城咁，非常神秘！我去嘅时候咁啱有人喺度唱圣诗，山洞入边好似环回立体声咁，通过天窗声音穿过各石室，系天籁之音呀😝

仲有其中一个岩洞，里面有一个地下泉水喷出，然后个个排队饮「圣水」，我哋包车司机同我讲，呢啲泉水系由山上雪山融雪而成🏔️我试咗一啖非常清甜😋 外面嘅石墙墙上有好多洞口，d人就会系咁丢石仔上去，据说如果成功卡中，就可以心愿达成！ 虽然呢几日已经睇过好多个修道院，但系个人觉得呢个系目前见过最有 feel 嘅，比深坑修道院更加特别！

加尼神庙 Garni Temple

加尼神庙 Garni 距离市区35公里，30至40分钟车程就到，系亚美尼亚唯一一座古希腊罗马柱廊式建筑神庙。不过早年地震时已毁坏，1969-1975年复修重建，真正嘅遗迹就散落喺公园入边。呢度算系少见嘅收费景点，门票 $1500 AMD ^{(CNY 28)}，建筑其实唔系好大，冇睇相咁壮观，不过都值得一去，因为同之前睇嘅修道院好唔同，而旁边嘅观景台可以睇到加尼峡谷～ 交通方法： 包车一日去呢两个景点来回叶里温 $6000 AMD ^{(CNY 111)} ($98 HKD ^{(CNY 92)}) 包车司机联络方式： 司机 what’s app：Hagop（虾膏）+374 43 187437 / +374 77 929938 仲可以坐巴士，不过非常转折，建议包车，唔建议自驾，外高加索三国啲人揸车好癫，唔适合。

叶里温阶梯 Cascade Complex

位于叶里温中心，广场同埋每一层楼梯都内有干坤，有各种现代艺术作品，登上楼梯嘅顶部仲可以望到阿拉腊雪山🏔️（挪亚方舟最后停泊处）。广场旁边仲有好多餐厅～行完楼梯可以落返去食饭！ 高加索游记终于完结了～听日会加多一篇实用资料💾之后就会移动到伊朗🇮🇷外高加索三国各有特色，而且消费都唔高，比欧洲大城市安全，非常值得一去～