我是阿金。不是甚麼泰國達人，單純是個因為喜歡泰星而曾經跑去曼谷學泰文的小花痴。
2020年2月22日
曼谷留學第206日：民間高手海南雞飯
@ Food + Plus
泰國曼谷暹羅區
飲食
一二三四五六日05:00 - 17:00
「水門海南雞飯係咪好好食，我要去」係我喺嚟曼谷玩嘅香港朋友口中聽過無數次嘅說話
其實... 我幾年前嚟旅行都一樣跟介紹去食過，老實講食完一次覺得好中伏，雞好「鞋」口，個汁又甜... 唔好食囉就係。不過好唔好食好個人，朋友想食我都唔會阻止，但如果真係單純只係想食海南雞飯而唔係為打卡，去 Siam Square 一個小巷食啦！！！
講緊間海南雞飯係 Siam 站6號出口，見到轉角位間7-11行入去，見到一間賣雜誌嘅檔口仔隔離有個熟食中心入面，38號檔，檔主係一個婆婆。
咪睇婆婆個檔細細地，好似好「嗡耷」咁，佢簡直係民間高手。佢碟海南雞飯夠大碟之餘，重點係啲雞超滑，超滑，超滑，仲有個汁一啲都唔似水門雞個甜辣醬，係類似辣椒汁，總知同水門雞相比好食好多，同樣都係 THB 40 (HKD 9)，點解唔食個高質啲嘅呢？！
熟食市場仲有其他檔，同朋友試咗豬手飯同船麵麵唔錯！ 每樣都係40、50泰銖左右
