14日窮遊外高加索三國 (阿塞拜疆、格魯吉亞、亞美尼亞) + 納卡 - 超詳盡實用懶人包

阿塞拜疆🇦🇿人民超友好熱情，路人成日擔心我哋唔識買飛，係街上只要露出一絲疑惑就會有人即刻上前幫手👬景點方面舍基絲綢之路古堡驛站同埋納夫塔蘭石油浴係最大亮點！ 格魯吉亞🇬🇪人就冇阿塞拜疆咁熱烈，可能已經見慣遊客，感覺係已發展歐洲國家咁樣款，不過玩嘅嘢比較多元化！其中最喜歡第比利斯浸溫泉同埋卡茲別克山區juta行山 + 聖三一教堂 + rooms hotel + 古多里滑翔傘～仲有難得首都都咁多嘢睇，第比利斯古城好靚～ 亞美尼亞🇦🇲有悲慘嘅歷史，經歷過種族大屠殺。最大亮點就係可以順便去404國家「納卡」。首都葉里溫周邊景點都唔錯，不過我去嗰幾日都唔好天，大打折扣。山區就冇格魯吉亞咁綠油油，睇歷史野同埋修道院比較多，首都感覺蕭條，冇乜嘢睇。食物唔好食，一係好鹹一係好酸🤦🏾‍♀️

亞美尼亞🇦🇲特區護照/bno免簽證 格魯吉亞🇬🇪特區護照持美國旅遊簽證/bno免簽，如果冇就evisa$20usd https://www.evisa.gov.ge/GeoVisa/ 阿塞拜疆🇦🇿evisa$24usd （注意相片大小規格） 申請網址：https://evisa.gov.az/en/

準備美金或歐羅換錢，香港應該冇得兌換，就算有匯率都唔好，唔建議。 部份高級啲嘅酒店或者餐廳可以收信用卡，但例如包車、交通或者活動大部份都以現金為主。 阿塞拜疆貨幣manat🇦🇿機場及市區有提款機銀聯EPS可用（推薦），機場亦有找換店，市區唔見有找換店。 格魯吉亞貨幣Lari🇬🇪唔需要換咁多，好多地方都有提款機或者找換店。銀聯/plus 嘅EPS可以ATM（比較建議），或者第比利斯市區好多找換店，歐羅美金都可以兌換，卡兹別克都有銀行可以兌換 亞美尼亞貨幣Dram🇦🇲如果由格魯吉亞坐小巴過境司機會帶你去邊境小店換錢，匯率幾好。市區銀聯卡提款唔成功，Yerevan 市區可以去SAS超市門口有找換店(35 isahakyan street)。

三國都係歐洲圓形兩腳入洞式

三國都係俄語系國家（前蘇聯國家分裂嘛😛） 俄語通行，另各有當地語言。阿塞拜疆英語普及率最低，格魯吉亞就一半一半。亞美尼亞英文算係最好，後生嘅都識英文。 電話要下載軟件，google translate 以便即時翻譯(download定三個國家嘅文字包），基本上指手畫腳+單詞溝通+google translate 就可以通行無阻

基本上全部酒店或者hostel都有wifi，只不過好多都好廢，網速超級慢。 由於我去六個國家，之後仲去埋伊朗，烏茲別克，唔想去一國買一張，所以買咗鴨寮街t mobile 30日全球無限上網，高加索三國都用得，不過！網速極慢，只可以勉強check地圖，send email，whatsapp，call車，基本功能，嗰啲消閑娛樂就唔使旨意。全程保持2G速度，叫做可以維持生命.. 如果淨玩高加索地區，可以去到嗰邊買啦，街上或者機場好多電訊商有得買卡，唔貴。

強烈不建議❌山路多都唔係重點，重點係呢三個國家司機駕駛技術凶狠，充滿戰鬥民族特質。又暴燥又勁快又故亂cut線，路上常有交通意外發生。我坐格魯吉亞小巴都有一次撞左。

唔係必須比小費國家，食飯如帳單上有服務費，都不需再比。小餐廳嗰d都唔洗比。

阿塞拜疆係比較世俗化嘅伊斯蘭國家，對男女衣著都冇乜特別要求，不過女仔都唔好太性感，始終不常見。 一年四季都記得帶外套🧥山區一日四季，成日都會好凍！有行山嘅要準備定舒適嘅運動鞋，酒店一般都係冇拖鞋，要自己準備～ 旺季係7-8月，天氣好風景好，好夜先天黑，有條件就呢兩個月去～山區都比較涼快，但係市區就好熱，然後佢哋啲車成日都唔開冷氣..熱死。著背心短褲就得，帶定一件薄外套山區備用。 4-6月，春夏季，滿山遍野都開花，諗起都覺得詩情畫意，不過山區仲係好凍嘅，洋蔥式着法，冷衫薄羽絨不可少～我係六月去嘅，大部份時間都熱，好天嘅日子都唔少，但係有兩日落雨同埋山區嘅日子，超級凍！ 9-10月，秋天都幾好唔熱又唔凍~衣着薄嘅長袖衫或者衛衣為主。 11-3月，淡季想睇雪景又或者滑雪嘅可以呢個時間去，個人來講就冇咁鍾意，日短夜長縮短咗遊玩嘅時間，而且山區綠油油先好睇～衣着方面要着好多衫，冷衫羽絨厚衫全部上陣！

可以嘅話唔好戴拎太大嘅行李，因為多斜路有啲仲係石板路好難推，而且通常坐小巴架車好細，行李太大會唔方便。我行李24寸(玩成個月冇得再細），勉強可以接受～ 洗頭水沐浴露嗰啲唔係間間酒店都有，建議自己準備 準備定啲零食杯麵之類，如果你有一個中國胃呢度啲嘢食就會唔係好啱食～

比香港慢4小時

呢幾個國家消費真心平，最好就係2-3人同行，咁樣包車嗰啲就會超抵（如4人同行行李可能就放唔入普通的士），我14日總消費$4727hkd（屬於比較慳儉，住宿通常都係經濟型/hostel獨立房間，但交通好多時都包車，土豪嗰啲就忽略呢個部份😛）

（以下價錢為三人房，值得推介嘅我先講，唔靚/一般嘅hostel不介紹了👀） 阿塞拜疆： -Naftalan 石油療養院Sehirli Naftalan mualice merkezi $120AZD -sheki 舍基古堡驛站Karvansaray$50AZD 格魯吉亞： -西格納吉-Club Kanudosi或guest house Shota $260hkd含早 -等比利斯-tbil home hostel $213hkd含早 -卡兹別克alpenhaus B&B $345hkd含早/有條件可住rooms hotel 網紅酒店約$1200hkd雙人房 以上都另有文章介紹，可以搵返我之前嘅post

往返價錢$4xxx-6000不等，可以選乘俄羅斯航空（由於國家糾紛最近停飛格魯吉亞）/卡塔爾航空/阿聯酋航空轉機前往，如果玩齊三個國家建議openjaw 不走回頭路，阿塞拜疆入亞美尼亞走。 阿塞拜疆巴庫機場代號GYD 亞美尼亞葉里溫機場代號EVN 格魯吉亞第比利斯機場代號TBS

必須下載 yandex.taxi 格魯吉亞，亞美尼亞及俄羅斯通用，類似Uber咁比街上截的士平三份二，而且唔怕兜路同埋搵唔到目的地，因為靠導航🧭

火車票(唔需要網上買，現場買都得，車飛唔緊張）： http://www.railway.ge 格魯吉亞主要旅行城市行程安排及建議停留日數： 所有景點以首都第比利斯為中心放射型咁向外出發，即是去一個城市要返回一次首都再作中轉，可因應個人喜好及旅行日數再作選擇。 首都第比利斯Tbilisi(1-2日) 黑海邊休閒城市—— 巴統Batumi(1-2日) 雪山徒步聖地—— 梅斯蒂亞Mestia(1-2日) 歐洲海拔最高村莊——烏樹故Ushguli(1日) 前往梅斯蒂亞中轉站—— 祖格迪迪Zugdidi(半日或者直接中轉) 紅酒小鎮——西格納吉Sighnaghi(1日) 雪山山區卡茲別克 Kazbegi(1-2日) 滑雪聖地——古多里Gudauri(半日) 斯大林故鄉—— 哥里Gori（半日） 世界文化遺產—— 姆茨赫塔Mtskheta(半日) 城際巴士站: -Didube 站小巴去Batumi,kazbegi,Mestia,mtskheta 都由此站乘坐 -Samgori站小巴去sighnaghi -Avlabari站小巴去亞美尼亞首都葉里溫Yerevan 交通參考： 第比利斯地鐵: 八達通卡$2GEL ^{(HKD 6)}可以幾個人用一張，走嘅時候可以退錢，一程$0.5GEL ^{(HKD 1)}，上山纜車都要使用呢張咭。 第比利斯附近移動建議使用apps “yandex taxi”會比街上叫的士平三份二左右。 姆茨赫塔mtskheta -包車第比利斯舊城去十字修道院車費$16GEL ^{(HKD 47)} -包車生命支柱主教座堂及返回第比利斯纜車站車費$20GEL ^{(HKD 59)} -didube 站坐巴士$1GEL ^{(HKD 3)}/人，可以去到生命支柱教堂，之後包車來回十字修道院$15-20GEL ^{(HKD 59)}（相差無幾，倒不如直接Yandex.Taxi 來回) 卡茲別克 -包車$150GEL ^{(HKD 441)} 走軍事大道途經zhinvali水庫，ananuri城堡，古多里滑翔傘，格俄友誼紀念碑 -不停站小巴🚐$10GEL ^{(HKD 29)}/人(stepantsminda 回程時間表:09:00/10:00/12:00/13:00/15:00/17:00，如果做唔啱呢啲時間可以拼車，唔使驚冇車返去) -拼車(會停留景點一下影相)$15GEL ^{(HKD 44)}/人 Stepantsminda 往卡茲別克聖三一大教堂 -包車$30GEL ^{(HKD 88)}(可能會貴啲因為我連Juta一齊傾，合共150GEL ^{(HKD 441)}) Stepantsminda 前往juta -包車$120GEL ^{(HKD 353)} 西格納吉sighnaghi -samgori地鐵站對面巴士站有小巴，$6GEL ^{(HKD 18)}/人，好多車冇乜時間表可言，車程兩個鐘 亞美尼亞葉里溫Yerevan 1)火車🚄每天晚上一班，22:15開出，07:30到達，頭等$110GEL ^{(HKD 323)}($293hkd)/二等四床一房$85GEL ^{(HKD 250)}($226hkd)/三等$66GEL ^{(HKD 194)}($175hkd)。好處就係可以慳返一晚酒店錢，火車都係臥舖。 2）小巴🚐車程五個半鐘，比火車快，班次又比較多，價錢亦平，$35GEL ^{(HKD 103)}一位（$93hkd)，車況唔錯，係Benz七人車，雖然有schedule但係一般都係等到人滿先開車（早上好快滿），第比利斯Avlabari 小巴站可以搵到marshrutka拼車小巴，不需要預早去買飛，09:00/11:00/13:00/15:00/17:00都有車，到Yerevan central bus station 落車 梅斯蒂亞Mestia

1. 第比利斯 夜火車21：10-06：30到Zugdidi，再3-4個小時到Mestia，巴士20Gel每人, 包一輛小車是80-90Gel。
2. Kutaisi到Mestia，車程5小時左右，25Gel每人； 第比利斯到Kutaisi的巴士頻繁，4個小時。
3. 從第比利斯一天有一班車直達Mestia，11-12個小時。

第比利斯機場前往市區巴士$10/人 祖格迪迪巴士去梅斯蒂亞$20/人 祖格迪迪去Ushguli 一日遊來回$40/人 梅斯蒂亞去巴統小巴$30/人 巴統去祖格迪迪小巴$12/人

行程安排 景點基本都係以首都葉里溫出發，放射型咁向外一天遊，不必轉換住宿，主要有四條路線。 東線：garni 神廟-geghard修道院-tsakhkadzor纜車-sevan lake塞凡湖（最好分兩日去） 西南線：Ejmiacin-khor virap 深坑修道院-noravank 東南線:Yerevan-tatev 北線-Yerevan-sanahin-haghpat修道院 而我只去左東線及西南線（呢兩修線路上嘅景點最愛歡迎），tatev都想去可惜時間唔夠，北線就無咁熱門嘅。 交通費用參考 包車去深坑修道院來回$10000AMD ^{(HKD 199)} 納卡兩日一夜tour$25000AMD ^{(HKD 499)}(含交通導遊住宿） 納卡市區的士去爺爺奶奶山$800AMD ^{(HKD 16)} tsaghkadzor+lake sevan +dilijan包車一日$18000AMD ^{(HKD 359)} garni 神廟+geghard修道院包車費$5000AMD ^{(HKD 100)} 市區的士到central bus station（伊朗巴士車站）$400AMD ^{(HKD 8)} 包車司機聯絡方式： 司機 what’s app：hagop（蝦膏）+37443187437/+374 77 929938

Baku機場巴士$4.5 AZD 市區巴士無論距離均一價$0.3AZD一人 Baku到Naftalan 包車費用$100AZN ^{(HKD 460)}一車 Naftalan 去seki 車費$55AZD 舍基前往邊境balaken 車費$45AZD 巴庫地鐵 ：巴庫地鐵票（Bakucard）全部要响站內的機器上購買，無人工售票。充值卡$2AZD，坐車單次$0.2AZD（不限距離同價） 行程： 舍基/Baku/Naftalan ：最少各一日 嘔心瀝血終於寫完，多字到爆！以上資料希望幫到未來要去呢三個國家嘅朋友～