二、消失的領導人

遊歷‧足跡 Travel Footprints / 北韓

凡人一個,只係較鐘意旅遊,同時又得閒研究下歷史同飲食文化,所以開左呢個Page,記錄一下小弟遊「歷」的足跡。

2020年2月23日

到達新義洲,首先係經過幾重過關,之後就上番旅遊車,並由我們朝鮮隨行導遊介紹朝鮮及行程。第一個景點相信大家都聽過,就係為朝鮮前領導人金日成與金正日銅像朝拜與獻花。經過領隊介紹,才知道朝鮮以前盛產銅礦,因此全國都會聳立不少領導人銅像俾遊客同人民朝拜與獻花。而鮮花由朝鮮官方單位提供,每扎$15蚊人仔。之後就叫我們一字排開向銅像鞠躬後再獻花。 未知係經濟問題想賺錢或真係有些遊客不尊重前領導人的關係,遊客唔再可以用自己相機影前領導人的銅像,只可以透過官方相機拍照,如果想要番張硬照,每張盛惠$30蚊人仔,不過導遊並沒有強迫每位遊客必須購買照片。 之後就參觀銅像後的朝鮮歷史博物館,呢個係我最期待的「景點」,果然無令我失望。一開始介紹完朝鮮領導人後,就開始講開國領導人金日成的風光偉績。博物館內容其實唔重要,但估唔到導遊的講解先係重點,最有印象的soundbite 有以下幾個: 一、朝鮮開國時曾經有學生運動,金日成政府好快就鎮壓。導遊居然話(大致內容):「好彩金日成政府開首就鎮壓,不然,就會發生中國1989年64天安門事件」明明同團內地遊客本身係度大聲講大聲笑,聽到後突然靜謐半秒,之後扮無聽到回復大講大笑的場面。 二、差唔多去到尾聲,講起金日成主體思想,簡單黎講係指人民應該聽從領袖的指揮,領袖係賜予人民生命的恩人和慈父。之後就問我地知唔知習近平主席的思想係咩呀。在場的內地遊客無人答到,估唔到個導遊就即場當頭棒喝:「你們是中國人嗎?怎麼會不知道!」 全程講解大約差唔多歷時一個鐘,發現篇幅9成都係講金日成的偉蹟,完全無提及第二位領導人金正日,估唔到朝鮮人都幾貼近真實。呢度容許我講少少歷史,其實韓戰後朝鮮以三八線為界分成南北韓,當時金日成政府領導的朝鮮政府經濟上的確比南韓優勝,但之後差距慢慢收窄,就算金日成發起「千里馬運動」都無法拉開距離。縱使當時南韓都係處於黑暗的威權統治,但於1969年後,朝鮮經濟就被追趕了。 之後去到90年代,共產主義沒落:波蘭變天、東西德統一,與及蘇聯瓦解,加上之後曾與中國斷交,使金正日接手後無法令朝鮮經濟復甦。因此,歷史博物館的歷史凍結於1960年代亦能夠理解。
二、消失的領導人
畫中宣揚全世界人民對金日成銅像崇拜的畫像
畫中宣揚全世界人民對金日成銅像崇拜的畫像
畫中為金日成與金正日於花園坐著休閒的畫像
畫中為金日成與金正日於花園坐著休閒的畫像
* * * 文章收錄於 遊歷‧足跡 Travel Footprints / 北韓 * * *
上一篇: 一、懷著緊張心情出發
下一篇: 三、街上奇景