三、街上奇景

去北韓旅遊主要都係坐旅遊車,之後導遊係車上有講有笑,看似同普通旅行團無異,但其實有唔少規矩要遵守,其中一樣就係旅遊車行緊時唔可以拎相機出黎影相。當中有一位內地團友唔識死,唔至一次拎部相機偷偷地影相,令到本身笑笑口的導遊突然間黑晒面,以兇神惡煞的態度同佢講你如果再拎部相機出黎影相,否則後果自負,而我(導遊)唔知會發生咩事。講到咁嚴重,究竟有咩野唔俾影呢?雖然無圖未必有真相,但都可以分享下街上幾個奇景。 (一) 滿城盡帶計程車 坐旅遊車的過程當中,其實我唔太理會導遊的介紹,反而喜歡留意外面的環境。首先覺得奇怪的係路面除左我地架旅遊車外,基本上無乜其他車行緊,最多行緊的反而係的士,彷彿感到「離晒地」的感覺。你想像唔到點解北韓會有咁大需求要咁多的士,一開始心諗係咪做假之際,我發現大部份的士都有人坐緊,同時亦有人會沿途截的士,彷彿需求好大。除左的士,另外就係單層巴士。每架巴士款式相對殘舊,亦未有冷氣提供,但都見到有好多人乘搭,我覺得咁先係反映番真實情況。 (二) 神秘的路人 街上除左見到的士外,仲有唔少路人。我發覺得佢地每人都有唔同的襟章,問過導遊後,原來朝鮮人民滿十七歲後就會得到襟章,證明係北韓人民的身份象徵,有如我地的身份證一樣,而襟章亦有幾款,主要分開普通人民同黨員。襟章主要印上已故領導人金日成同金正日的人像,而朝鮮人民必須將襟章戴係左邊心臟位置,主要原因有兩個﹕第一個係北韓係共產國家,亦即左派主義,而另一個原因係要人民無時無刻都要心繫兩位已故領導人。另外,無論起緊樓的建築工人、搭緊巴士或的士的乘客、踩緊單車的人,甚至係街上傾緊計的路人,每當旅遊巴經過,都會用一個奇怪的眼光望住我地,唔知係咪周圍的路人對我地旅遊巴真係有好大興趣,定係有「其他」原因呢? (三) 空樓計 講真,新義州的道路比一般東南亞國家如越南、柬埔寨等仲要平坦,周圍亦好乾淨,無任何垃圾,不過就見唔到有任何垃圾筒。而道路兩邊都有唔少高樓大廈,大約八至十層高,似係70-80年代feel。不過有個奇怪的地方係當你仔細留意,會發現邊間屋未必有門同窗,而家內裏漆黑一片,睇落唔似有任燈同擺設,好似一座座空殼一樣,我估這些「空樓」的存在某程度上係想令遊客見到北韓繁榮的一面。
三、街上奇景
* * * 文章收錄於 遊歷‧足跡 Travel Footprints / 北韓 * * *
上一篇: 二、消失的領導人
下一篇: 四、係北韓居然要食葉?!


留言