高加索睡火山玩滑翔傘
@ 卡茲別克山 Mkinvartsveri

著名嘅ananuri城堡係lonely Planet 格魯吉亞封面相片拍攝嘅地方，曾經係私人軍事城堡，2007年被列入聯合國教科文世界遺產。古堡坐落喺湖同埋山之間，幾有童話feel~遊覽古堡唔需要門票🎫我曾經喺網上見過張相係有一個石窗望出去城堡嘅屋頂，覺得好靚，所以一心要搵到呢個位！ 原來都唔難搵到，但係爬上去確實有難度！要手腳並用爬上個城牆（落嚟仲麻煩），再沿着啲好窄嘅樓梯行上去就會見到，雖然有啲艱辛，但係我見到啲阿婆阿伯都爬上去，唔係唔爬嘛😛我哋個司機佛誕叔叔好頑皮，全不費吹灰之力就飛咗上去😂

城堡外面仲有得租d古怪衣服影相，我租咗件鐵甲戰衣，仲有佩劍添(真係無聊😂）..本來$5gel，俾我講到$3gel成交～～我玩完之後好多遊客爭住要玩😝

去完水庫同埋ananuri城堡，之後沿着軍事大道繼續前行就嚟到格俄友誼紀念碑，格魯吉亞同俄羅斯曾經係好朋友，不過依家見到呢個紀念碑特別覺得諷刺，格魯吉亞啱啱先有反俄羅斯示威...俄羅斯航空都宣佈取消飛格魯吉亞🤦🏾‍♀️好吧，就當一個景點咁睇～紀念碑旁邊山谷影得好靚的～

呢個紀念碑都唔係重點，只係伴菜，呢一日嘅主菜係-喺古多里gudauri玩滑翔傘⛱ 古多里係滑雪勝地，夏天就好適合玩滑翔傘，玩滑翔傘唔需要預先報名，去到紀念碑外面停車場就有好多着住橙色或者藍色背心嘅sales拉客去玩滑翔傘，即場有個小Office俾錢，兩間公司價錢一樣，質素都係差唔多，$250GEL ^{(HKD 735)}一人（$697hkd)，都幾平(不過諗諗吓之前土耳其好似仲平啲），飛行大約20分鐘包含拍影片(亦可WhatsApp/email/facebook預約，不過個人覺得冇必要，建議睇好天氣先當日再決定，因為山區天氣好飄忽成日落雨，walk in就得) 我哋事先已經同包車司機表明我哋要玩滑翔傘，所以去到嗰個停車場司機就直接將我哋交比嗰啲sales，俾錢寫個名就上車🚌送去山上起飛地點~

我喺土耳其🇹🇷同塞浦路斯🇨🇾總共玩過兩次滑翔傘，今次喺格魯吉亞係第三次玩😬比較之下，古多里呢個滑翔傘嘅營運模式就比較流水作業，連嗰啲乜乜需知都唔使簽，姓甚名誰都唔使寫，去到起飛地點就幾個員工埋來好快速着好裝備，頭盔都係自己帶，完全未有心理準備就已經飛咗出去😂整體感覺就係比較為賺錢，飛行員一日要飛十幾次咁樣..其實都冇乜交流😅不過都安全嘅，始終佢哋好有經驗，大家性命係捆綁在一起的～ 由於有兩個「助跑員」，所以我基本上唔跑就已經離地😂 20分鐘左右嘅飛行入邊，大部份時間都係平穩地飛翔，係臨尾飛行員有問我鍾唔鍾意刺激要唔要轉下，我就話好，先由之後嘅瘋狂轉彎（超暈的😂），降落嘅時候有提醒我要提高雙腳，我有做啊，不過好似land得麻麻地，我成個仆左落地🤦🏾‍♀️ 總結來講平平哋玩下都OK嘅，風景都唔錯～都係一個唔錯嘅體驗！路過不妨玩下～我兩位畏高同埋唔玩機動遊戲嘅小伙伴都話唔覺得驚（其中一位之前同我去土耳其就係唔敢玩..)