現職空姐，工餘時間不停去旅行，捐窿捐罅四圍走
2019年10月24日
德黑蘭地鐵體驗 🚇
@ Mellat Subway Station ایستگاه مترو ملت
Tehran, Tehran, 伊朗
鐵路站
食完早餐沖完涼，我哋三個總算回血💪🏽安裝好搭的士軟件snapp(伊朗必備神器)，之後就即刻出街玩～為咗慳錢同埋感受一下當地人嘅生活，我哋行去搭地鐵🚇去第一個景點-前美國大使館~
離開hostel，六月嘅天氣真係熱到噴火，大約有40度左右吧，三個亞洲籍女子行在街上，遭受到不少奇怪嘅目光（呢個情況持續八日，小伙伴表示略為有啲不安）...
每個地方嘅首都治安始終比較複雜，我哋hostel職員都提醒我哋唔好拎住個電話做導航周圍行，用紙地圖會比較好..因為街上超級多電單車🛵仲要不停車上行人路左穿右插咁樣（有啲似越南咁），可能會有飛車黨，所以我哋都行得比較小心注意身邊路人，及好好保管財物，大約行左10分鐘就到達地鐵站🚉
喺伊朗搭地鐵都係一個好特別嘅體驗，首先買飛真係睇唔明啲波斯外星文，連數字都睇唔明，所以去人工櫃檯買，我用酒店比我嘅地圖指出我哋目的地嘅地鐵站，$0.87hkd單程坐好多個站（最貴嘅距離都好似唔過兩蚊），平到爆燈~
地鐵站感覺同俄羅斯嘅有啲似，有一種落地洞嘅感覺，然後每一架地鐵都有女性專用車卡，入面全部都係女人👩🏿同男性車廂只有一個鐵閘隔開😅（人多唔方便影相所以冇影到）
係女性車廂入邊，算係冇咁多目光打量..我亦都周圍觀察下首都女性嘅打扮，唔，波斯美女真係唔少，然後不少打扮都比較時尚，冇想像中咁傳統，即係唔一定係清一色黑色，然後個頭巾都包得比較隨意，有啲甚至係求其「浪」住响條馬尾上邊😆不過之後幾日，越往內陸走見到啲人嘅衣着打扮就越傳統～
另外，地鐵上亦都冇網上睇人哋講咁熱烈地搵你傾計合照等等情況發生（雖然都會眼望望你）..車廂入邊都幾擠迫，最奇特嘅係會有小販上車推銷商品，其中嘅商品有電話叉電線，小包裝藏紅花等等～伊朗女性們搭車都不忘購物😆有趣有趣～
費事一篇寫太長，今日講到呢度先～下一篇再講德黑蘭前美國大使館🇺🇸
| 上一篇 | : | |
| 下一篇 | : |